Dita e verës nuk do jetë fare siç e ka emrin. Kthjellime dhe alternime vranësirash pritet të ketë kryesisht në Veri dhe Qendër duke rrezikuar nga shira të papërfillshën por kryesisht kthjellime në zonat Jugore, raporton Meteoalb.
Pasditja përmirëson akoma më tej kushtet e motit, në të gjithë territorin shqiptar.
Sakaq, sipas parashikimit të IGJEUM, sot pasdite (e martë, dt.13) dhe nesër (e mërkurë, dt.14) priten reshje të dobëta në shumicën e qarqeve.
Në qarkun Shkodër dhe Elbasan reshjet priten të jenë mesatare dhe lokalisht intensive të shoqëruara edhe me shtrëngata
TEMPERATURAT
Nesër (e mërkurë, dt.14) temperaturat minimale dhe maksimale të ajrit pritet të arrijnë:
në bregdet: 8 / 15 °C
në vendet e ulëta: 5 / 15 °C
në vendet malore: 1 / 10 °C.
RREZIKU NGA PËRMBYTJET
————————————–
Nga llogaritjet hidrologjike të IGJEUM-it, rezulton se lumenjtë Drin, Buna dhe Liqeni i Shkodrës do të kenë prurje dhe nivele të larta. Sot (e martë, dt.13) në basenin Drin-Buna dhe Liqenin e Shkodrës do të RRITEN PRURJET në pjesët e larta malore duke përfshirë edhe kaskadën e hidrocentraleve mbi lumin Drin. Në pjesën fushore të basenit që i përket Lumenjve Drin-Buna dhe Liqenit të Shkodrës do të vazhdojë të ketë nivele të larta të ujit dhe me tendencë për RRITJE TË NIVELEVE DHE HARTËS SË PËRMBYTJEVE. Nesër (e mërkurë, dt.14) nivelet në pjesën e Ultësirës së Nën Shkodrës do të ngelen të larta për shkak të rritjes së shkarkimit të prurjeve nga Liqeni i Shkodrës në Lumin Buna, por do të varen edhe nga shkarkimet e hidrocentraleve mbi lumin Drin. Për arsye të vazhdimit të rrezikut nga përmbytja është vendosur të mbahet shenja e paralajmërimit nga përmbytja për qarkun e Shkodrës . Ngjyra e kuqe e qarkut është vendosur për shkak të rrezikut nga përmbytjet. Në pjesën tjetër të territorit do të ketë shtim të prurjeve kryesisht në pjesën qendrore dhe veriore të territorit.
Ky informacion do të përditësohet nga IGJEUM sipas llogaritjeve të ardhshme dhe do të njoftoheni për çdo ndryshim në parashikimin e përmbytjeve.
