Ambasadori i BE, Luigi Soreca, zv. Ambasadorja amerikane Leyla Moses Ones dhe Ambasadori i OSBE, Bernd Borchardt ishin sot i pranishëm në ceremoninë e diplomimit të magjistratëve të rinj.
Gjatë fjalës së tij, Soreca ju drejtua magjistratëve duke thënë se po marrin mbi supe një përgjegjësi shumë të madhe.
Luigi Soreca: “Gjyqtarët janë si mjekët ose i shkatërrojnë ose i shpëtojnë jetët. Nuk asgjë më të keqe dhe shkatërruese sesa padrejtësia ose drejtësia e vonuar. Keni të drejtë të jeni krenar sot por keni edhe një përgjegjësi shumë të madhe mbi supe mbi të ardhmen. Duhet të jeni krenar për arritjet tuaja sot dhe të shërbeni me përulësi nesër. Paçi një karrierë të ngritur.”
Ndërsa zv. Ambasadorja amerikane tha se magjistratët e rinj duhet të jenë agjentë të ndryshimit për një Shqipëri të lirë, të drejtë dhe demokratike.
Leyla Moses Ones: “Udhëtimi juaj do ju vendosë në pozicione për të ndërtuar dhe mirëmbajtur sistemin e ri gjyqësor të Shqipërisë për dekadat e ardhshme. Kjo ju jep fuqinë e jashtëzakonshme që të ndërtoni vendim pas vendimi, ditë pas dite një sistem gjyqësor të ndershëm dhe transparent, pa korrupsion.
Ju nxis të gjithëve të bëheni agjent të ndryshimit për një Shqipëri më të lirë, më të drejtë dhe më demokratike. Ushtrojeni këtë fuqi tuajën të re me përgjegjësi. Përfaqësojeni profesionin tuaj të ri me nder dhe kryejini detyrat tuaja në mënyrë etike.”
Nga ana tjetër, Borchardt shprehu besimin se brezi i ri i gjyqtarëve dhe prokurorëve do investojnë në reformën në drejtësi.
Bernd Borchardt: “Ju inkurajoj ju brezin e ri të gjyqtarëve dhe prokurorëve që të bëni më të mirën dhe të gjithë shpresojmë që të investoni në reformën në drejtësi.
Që kjo reformë të bëhet realitet. E ardhmja e vendit tuaj është në shpatullat tuaja. Duhet të jeni të ndërgjegjshëm për përgjegjësinë që ju vjen në momentin që bëni betimin.”
