Katër persona janë proceduar penalisht në zonat e Bulqizës dhe Dibrës për shkak të vjedhjes së energjisë elektrike.
Operatori i Shpërndarjes së Energjisë Elektrike bën me dije se nga kontrollet e ushtruara është konstatuar se abonentët Suri M., Qani Sh., Jetmir A. dhe Fatjon A. vidhnin energjinë elektrike, ku dy të fundit merrnin energji pa pasur kontratë me OSHEE-në.
“Pas rasteve të publikuara për rajonin Shkodër, kontrollet në të cilin vijojnë ende, grupet e task forcës në rajonin e Burrelit kanë zbuluar raste te abonentëve, të cilët furnizoheshin përmes lidhjeve të paligjshme dhe pa patur kontratë me kompaninë. Konkretisht, nga kontrollet e ushtruara ditët e fundit, janë konstatuar raste të vjedhjes së energjisë në zonat Bulqizë dhe Dibër, duke proceduar në polici, abonentët Suri M., Qani Sh., Jetmir A. dhe Fatjon A.
Ndërkohë, OSHEE bën me dije se po vijojnë kontrollet për evidentimin e rasteve, ndërprerjen e energjisë dhe denoncimin e personave që përfitojnë energji në mënyrë të jashtëligjshme.
“Hetimet për këta shtetas i kanë kaluar organeve kompetente, ndërsa Drejtoria Rajonale e OSHEE Burrel vijon kontrollet për prerjet e dritave ndaj debitorëve dhe kallëzimin në polici të vjedhësve”, thuhet në deklaratën e shpërndarë nga OSHEE.
Vetëm gjatë 2 muajve të fundit janë referuar në polici të paktën 50 raste, abonentë familjarë dhe biznese si pasojë e vjedhjes së energjisë elektrike.
Gjatë kontrolleve, OSHEE ka konstatuar raste të manipulimit të matësit, lidhjeve të paligjshme dhe furnizimit pa kontratë.
