Drejtori i të ashtuquajturës Zyre për Kosovën në Serbi, Marko Gjuriç ka thënë se plani i presidentit të Serbisë, Aleksandar Vuçiç dhe Qeverisë serbe është t’i ndihmojë komunave serbe në Kosovë.
Ai po ashtu beson se plani do të realizohet gjatë vitit 2019, pa marrë parasysh të gjitha vështirësitë.
“Shteti i Serbisë do të vazhdojë të luftojë për të mbrojtur popullin e saj në Kosovë, si dhe interesat e saj legjitim. Presidenti Vuçiç dhe Qeveria kanë shpenzuar energji të mëdha dhe përpjekjet do të vazhdojnë edhe më tutje. Asnjë nga Qeveritë e kaluara nuk ka bërë angazhim më të madh për Kosovën”- u shpreh Gjuriç për “TV Pink”.
Ai ka thënë se serbët në Kosovë kanë një jetë të vështirë me shumë brenga.
“Ajo për çka nuk kemi shpesh mundësi të flasim është mënyra e jetesës së serbëve në Kosovë, me shumë shqetësime dhe brenga”, shtoi ai.
“Por, plani i presidentit Vuçiç dhe Qeverisë serbe është të ndihmojë të gjitha komunat serbe në Kosovë dhe ky plan do të realizohet në vitin 2019, pa marrë parasysh vështirësitë. Mitrovica e Veriut do të fitojë një qendër klinike, Graçanica një spital të ri, Trepçka një fabrikë të re të akulumatorëve. Pa marrë parasysh presionet, dëshirojmë të krijojmë kushtet që njerëzit tanë të qëndrojnë në vendbanimet e tyre”, theksoi Gjuriç.
