Një raport i Komitetit të Punëve të Jashtme në Parlamentin britanik vë theksin në situatën e vendeve të Rajonit të Ballkanit, ndërsa theksohet se ato vuajnë nga udhëheqje autokratike, institucione të dobëta demokratike, korrupsioni dhe krimi i organizuar. Sipas raportit në fjalë, në Ballkanin Perëndimor sundimi i ligjit dhe përparimi drejt demokracisë ose është në stanjacion ose ka bërë hapa prapa.
Në këtë kuadër, raporti i Dhomës së Lordëve me titull “Mbretëria e Bashkuar dhe e ardhmja e Ballkanit Perëndimor”, thekson se kapja e shtetit, udhëheqja autoritare dhe politikat nacionaliste po vënë në rrezik sundimin e ligjit dhe arritjet në qeverisjen e mirë.
Raporti gjithashtu vë theksin në ndikimin rus në rajon, me qëllim pengimin e integrimit të afërt të vendeve me Perëndimin.
Por gjithashtu evidentohet se përveç Rusisë, ndikim në Ballkanin Perëndimor kanë edhe Turqia, Emiratet e Bashkuara apo Kina.
Raporti i Dhomës së Lordëve vë theksin se largimi apo emigrimi i trurit, njerëzve të arsimuar, rritja e ekstremizmit dhe nacionalizmit anti-demokratik, shtojnë pasigurinë për anëtarësim në Bashkimin Europian.
Sipas raportit, të hartuar pas një vizite në vjeshtën e kaluar të një përfaqësie të Dhomës së Lordëve në Ballkanin Perëndimor, Britania e Madhe pavarësisht Brexit, mbështet stabilitetin dhe prosperitetit në rajon.
“Ne do të mbështesim rajonin për të promovuar lirinë e mediave dhe shprehjes, luftën ndaj krimit të organizuar, trafikimit dhe korrupsionit”, thuhet ndër të tjera në raport.
