Në Sudan, të paktën 13 vetë u vranë të hënën, kur forcat ushtarake hapën zjarr për të shpërndarë një protestë një javëshe në Khartoum.
Shpërthimet dhe zjarri i armëve të rënda u dëgjuan të hënën në mëngjes, ndërsa forcat sudaneze të sigurisë shkuan në vendin e protestës jashtë Ministrisë së Mbrojtjes.
Sipas burimeve spitalore, 13 vetë u vranë dhe shumë të tjerë u plagosën rëndë gjatë përleshjes.
Një zëdhënës i këshillit ushtarak në pushtet në Sudan tha se bastisja kishte në shënjestër elementë kriminalë dhe mohoi se forcat e sigurisë kishin kryer shkatërrime. Ambasada amerikane në Khartoum shkroi në Twitter se sulmet ndaj protestuesve ‘duhet të ndalen’.
Ambasada britanike e dënoi sulmin dhe e quajti atë një ‘hap të egër që do të çojë në më shumë polarizim dhe dhunë’.
Protesta filloi disa javë më parë, pasi civilët dhe zyrtarët ushtarakë argumentuan mbi përbërjen e një qeverie kalimtare, pas përmbysjes së udhëheqësit Omar al-Bashir në prill, pas protestave masive kundër sundimit të tij 30-vjeçar.
