3 muaj, më parë në 30 mars, Mariglen Matjani 28 vjeç dhe Laert Hasalla 30 vjeç qëlluan me armë një 22-vjeçar me inicialet M.H,.
E ndonëse objektiv ishte i riu, e plagosur në këmbë, mbeti halla e 22-vjeçarit, 60-vjeçarja Bajame Sejena e cila ndodhej në të njëjtin mjet me të riun, në momentin kur ndodhi ngjarja.
Sot pas 3 muajsh, Matjani 28 vjeç dhe Hasalla 30 vjeç janë arrestuar. Kujtojmë se Kastriot Hasalla, babai i 22-vjeçarit akuzohet për vrasjen e vëllait të Laert Hasallës, Romeo Hasallës, ngjarje që ndodhi 2 vite më parë.
Romeo i cili prej vitesh jetonte në Greqi, kishte vetëm 3 ditë që kishte ardhur për të takuar familjen. Vrasja e Romeos erdhi pas një konflikti mes kushërinjve Hasalla.
NJOFTIMI I POLICISE
Finalizohet si rezultat i një hetimi intensiv tremujor, të kryer me metoda speciale, operacioni policor i koduar “Pasoja e padëshiruar”. Vihen në pranga porositësi dhe ekzekutori i tentativës për të vrarë me armë zjarri, për motive gjakmarrjeje, një 22-vjeçar. Nga të shtënat mbeti e plagosur halla e 22-vjeçarit, pasi ndodhej në të njëjtin automjet me këtë shtetas, në momentin e të shtënave.
Specialistët e Komisariatit të Policisë Lushnjë, në bashkëpunim me ata të Seksionit për Hetimin e Krimeve të Rënda të Drejtorisë Vendore të Policisë Fier, si rezultat i një pune hetimore intensive tremujore, të kryer me metoda proaktive, në bashkëpunim me Prokurorinë e Fierit, kanë organizuar dhe finalizuar operacionin policor të koduar “Pasoja e padëshiruar”.
Si rezultat i provave të siguruara në kuadër të këtij operacioni, u bë e mundur zbardhja e plotë e një tentative për vrasje, e ndodhur më datë 30.03.2023, në fshatin Ballagat, si dhe kapja dhe vënia në pranga e shtetasve M. M., 28 vjeç dhe L. H., 30 vjeç, të dy banues në Ballagat, Lushnjë. Nga tërësia e veprimeve hetimore të kryera, rezultoi se shtetasi L. H. ka paguar shtetasin M. M., për të vrarë për motive gjakmarrjeje, shtetasin M. H, 22 vjeç (babai i shtetasit M. H. akuzohet për vrasjen e vëllait të shtetasit L. H.) Për të përmbushur porosinë e marrë, shtetasi M. M. ka qëlluar me armë zjarri në drejtim të automjetit me të cilin qarkullonin shtetasi M. H. dhe halla e tij, shtetasja B. S., 60 vjeçe. Nga të shtënat ka mbetur e dëmtuar në këmbë, 60-vjeçarja. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
