Policia franceze ka çarë gomonen e fryrë të emigrantëve shqiptarë dhe kurdë, të cilët donin të iknin për në Britani përmes detit duke kaluar kanalin që lidh Francën me Britaninë e Madhe.
Lajmi është bërë i ditur nga “Channel 4 News”, një media britanike, e cila ka publikuar një video ku emigrantët duan të largohen por përpjekja e tyre ka dështuar.
Ka qenë policia franceze e cila ka çarë gomonen me të cilën donin të niseshin emigrantët ndërsa ka përdorur spray me piper mbi ta.
Grupi i emigrantëve përfshinte shqiptarë dhe kurdë irakianë.
Shqiptarët që duan të kalojnë kufirin që lidh Francën me Britaninë e Madhe janë të shumtë, dhe së fundmi mediat britanike i kanë kushtuar vëmendje këtij fenomeni.
Oficerët e policisë shqiptare do të vendosen në Dover për të ndihmuar në identifikimin dhe dëbimin e emigrantëve të paligjshëm nga Shqipëria. Kjo është pjesë e një masë reagimi e vendosur së fundi mes autoriteteve shqiptare dhe britanike pas rritjes së numrit të klandestinëve nga Shqipëria drejt Anglisë.
Ministri Bledi Çuci ka thënë se kush tenton të futet ilegalisht në Britani rrezikon 4 vjet burg.
