Detaje të reja dalin në lidhje me hetimet e kryera nga Prokuroria e Rrethit Gjyqësor Berat në lidhje me serat e mbjella me hashash në fshatin Drenovicë të ish-komunës Kutalli në bashkinë Dimal.
Në krye të hetimeve për zbardhjen e kësaj veprimtarie kriminale është gruaja e hekurt e Prokurorisë së Beratit, prokurorja Albjona Papajani, e cila mësohet se ka asistuar deri në përfundimin e marrjes në pyetje të 106 të shoqëruarve që u kapën nga policia brenda dhe jashtë serave të kanabisit.
Burime nga prokuroria e Beratit bëjnë me dije se,dy gratë e arrestuara mes 11 të arrestuarve janë nënë e bijë nga fshati Nikël i Fushë-Krujës, ndërkohë që dy prej burrave të arrestuar janë bashkëshortët e tyre.
Të njëjtat burime konfirmojnë se familja nga fshati Nikël dyshohet të jetë organizatorja dhe mbikëqyrësja e të gjithë aktivitetit kriminal të prodhimit dhe tregtimit të lëndës narkotike dhe se kjo familje ka lidhje me “kokat” e aktivitetit kriminal që dyshohet se janë dy shtetas nga fshati Nikël, tashmë të identifikuar por emrat e tyre nuk bëhen ende publik për shkak të hetimit, deri në arrestimin e tyre. Po kështu mes të arrestuarve është edhe pronari i serës, Hamit Dyli (i njohur në fshat si Xhimi Dyli), i cili edhe pse ka deklaruar në polici se serën e kishte lënë me qira dhe nuk ishte në dijeni të aktivitetit që kryhej brenda saj, u kap nga policia brenda ambienteve të serës. Të njëjtat burime konfirmojnë se janë sekuestruar 3 kallashnikovë, 3 pistoleta dhe një sasi e konsiderueshme parash, pasi çdo grua e shoqëruar ka pasur me vete nga 1 milion-1 milion e 300 mijë lekë (të vjetra) secila.
Prokurorja ka regjistruar tashmë procedimin penal për veprën penale “Prodhim dhe Shitje të Lëndëve Narkotike”, e kryer në bashkëpunim dhe pritet që 11 të arrestuarit të dalin përpara togave të zeza të Gjykatës së Rrethit Gjyqësor Berat brenda 72-orëve nga arrestimi i tyre, për tu njohur me masën e arrestit. Burimet zyrtare të Prokurorisë së Beratit konfirmojnë se 95 gratë e tjera që u konstatuan në serat e përshtatura për përpunimin e lëndës narkotike “cannabis sativa” do të hetohen nga organi i akuzës në gjendje të lirë. Ato janë transportuar në orët e para të mëngjesit drejt Kamzës, nga ku do të drejtoheshim me mjete publike drejt banesave të tyre në Fushë-Krujë, Lezhë, Shkodër e Tiranë.
Parcelat e hashashit në fshatin Drenovicë në bashkinë Dimal u zbuluan dhe asgjësuan mëngjesin e djeshëm gjatë një aksioni “blic” të Drejtorisë Vendore të Policisë Berat dhe Drejtorisë së Përgjithshme të Policisë.Në aksion janë përfshirë Inspektorët e Sektorit të Narkotikëve dhe Trafiqeve, Forcat e Posaçme Operacionale dhe Forcat e Ndërhyrjes së Shpejtë.Lënda narkotike prej 800 kilogramësh ishte mbjellë në një sipërfaqe prej 2 hektarësh dhe serat ku ndodhej kanabisi kanë qenë ngjitur me serat e domateve dhe perimeve të tjera të mbjella brenda tyre. Paketimi, sistemimi i drogës dhe përpunimi i saj kryhej brenda serës nga gratë e punësuara nga organizatorët dhe kokat e këtij aktiviteti kriminal.
