Autoritetet greke po vijojnë hetimet në lidhje me vrasjen e dy shqiptarëve Kreshnik Çerçizaj 41-vjeç dhe Armando Ogranaja 44-vjeç në mes të Athinës.
Të dy viktimat ishin emra të njohur për policinë greke.
Ndërkohë, mediat fqinje kanë ngritur dyshime se vrasja e dyfishtë ka lidhje me ekzekutimin e një biznesmeni në Tiranë. Ngjarjet janë duke u hetuar nga autoritetet greke.
Bëhet fjalë për vrasjen e biznesmenit Edmond Papa. 49-vjeçari u vra në një lokal në rrugën “Fadil Bidinaku” në Tiranë. Ai mori 9 plumba dhe humbi jetën rrugës për në spitalin e Traumës.
Nga ana tjetër, 41-vjeçari i vrarë në Greqi ishte arrestuar në Korinth në vitin 2016 pas zbulimit të një plantacioni të madh hashashi, ku dyshohet se ishte i përfshirë edhe biznesmeni që u vra në Tiranë. Ai njihej edhe si “Nikos” dhe së bashku me Papën ishin dy figurat kryesore të përfshirë në tregtinë e hashashit, por biznesmeni kishte arritur të arratisje nga Greqia në vendlindje.
Tashmë rastet janë duke u hetuar si të lidhura me njëra-tjetrën.
“Sekretet” e burgjeve
“Nikos”, siç njihej 41-vjeçari në Nea Smyrni, ishte liruar me kusht nga burgjet greke në vitin 2020 dhe kishte një dosje penale voluminoze.
Ai është akuzuar si anëtar në organizatë kriminale, trafik imigrantësh të paligjshëm, trafik dhe mbajtje droge, armëmbajtje, zhvatje, tentativë vrasje, falsifikim, grabitje dhe vjedhje.
Që nga vitit 2008 ai hynte e dilte nga burgjet që nga viti 2008 pa u ndëshkuar, pasi me daljen e tij ra sërish në paligjshmëri.
Thuhej se sa herë që vuante një dënim në burgjet e vendit, hapte punë dhe gjente bashkëpunëtorë të rinj që, kur të dilte, të ishte gati për hapin e radhës në botën e krimit.
Dukej se 41-vjeçari brenda burgjeve, e veçanërisht në Korydallos, ka krijuar miqësi të ngushta, por edhe hasmëri të forta, kryesisht me bashkatdhetarët.
Për këtë arsye policët me përvojë të Departamentit të Vrasjeve janë në kërkim të informacionit nga brenda burgjeve, pasi kanë të dhëna të vlefshme se porosia e vrasjes së “Ujkut” është nënshkruar në një nga burgjet në vend.
Duke marrë parasysh rrënjët e thella të mafies shqiptare në burgjet greke dhe rastet e mëparshme të porositjes së vrasjeve nga qelitë, një mundësi e tillë nuk përjashtohet.
Ndërkohë, vrasja e dyfishtë është regjistruar nga kamerat në kafenenë e mbushur plot me njerëz dhe policia po përpiqet të kuptojë nëse ekzekutori ka pasur një bashkëpunëtor që luante rolin e kamerierit.
