Valter Bami, 37 vjeç nga Nikla e Krujës, është ndaluar zyrtarisht nga Policia e Shtetit me urdhër të Prokurorisë së Tiranës. Ndalimi i këtij shtetasi vjen pas atentatit të ndodhur në shtëpinë e Gentjan Bejtjas, ku mbeti i vdekur kunati i tij, Ramazan Sino.
Ngjarja ndodhi në orët e para të datës 3 korrik dhe rreth orës 04.00 të mëngjesit të kësaj dite, në polici është shoqëruar shtetasi Valter Bami. Atij i është marrë deklarim dhe faktorë plotësues në lidhje me ngjarjen dhe është lënë i lirë.
Ndërkohë, sot më datë 6 korrik, bazuar në përgjigjen e aktit të ekspertimit kimik, ka rezultuar se në dorën e majtë të shtetasit Valter Bami, janë konstatuar faktorë plotësues të qitjes me armë zjarri.
Mbi bazën e këtij akti ekspertimi, Prokuroria e Tiranës ka lëshuar urdhrin e ndalimit për këtë shtetas për veprën penale “Mbajtja pa leje dhe prodhimi i armëve, armëve shpërthyese dhe i municionit”. Rrreth orës 20.30 të mbrëmjes së sotme, Valter Bami është lokalizuar dhe ndaluar në Nikël.
Njoftimi i plotë – Drejtoria Vendore e Policisë Tiranë
Në vijim të veprimeve hetimore në lidhje me ngjarjen e datës 03.07.2023, ku në fshatin Larushkë, Krujë, në oborrin e banesës së shtetasit G. B., është qëlluar me armë zjarri e si pasojë ka humbur jetën shtetasi R. S. Rreth orës 04:00 të po kësaj date, është shoqëruar shtetasi V. B., 37 vjeç, të cilit i janë marrë faktorët plotësues dhe deklarim në lidhje me ngjarjen e mësipërme e më pas është lënë i lirë, ju informojmë se:
Sot me datë 06.07.2023, bazuar në përgjigjen e aktit të ekspertimit kimik, ka rezultuar se në dorën e majtë të shtetasit V. B., janë konstatuar faktorë plotësues të qitjes me armë zjarri.
Mbi bazën e këtij akti ekspertimi, Prokuroria pranë Gjykatës së Shkallës së Parë të Juridiksionit të Përgjithshëm Tiranë ka lëshuar sot më datë 06.07.2023, urdhrin e ndalimit për këtë shtetas për veprën penale “Mbajtja pa leje dhe prodhimi i armëve, armëve shpërthyese dhe i municionit”, parashikuar nga neni 278 i Kodit Penal.
Po sot, rreth orës 20:30, në fshatin Greps, Nikël, është lokalizuar, kapur dhe shoqëruar në ambientet e DVP Tiranë shtetasi V. B., 37 vjeç, banues në Nikël, Fushë Krujë.
Ndërkohë vazhdojnë intensivisht hetimet për dokumentimin e plotë ligjor të ngjarjes së mësipërme.
