Një shtetas shqiptar, i shpallur në kërkim ndërkombëtar, është arrestuar së fundmi nga policia italiane. Identiteti i tij nuk bëhet i ditur por mediat italiane thonë se shqiptari është arrestuar në një hotel në Rimini. Dyshohet se ai është një nga personat e përfshirë në masakrën e Velipojës në fund të muajit qeshor.
Një konflikt mes familjes Ferracaku dhe Gocaj për ndarjen e shezlongave çoi në përdorimin e armëve ku humbën 4 persona dhe u plagosën 2 të tjerë. Viktimë mbeti Kujtim Ferracaku 59 vjeç, pronar i hotel “Fantazia”, vëllezërit Xhovani dhe Edmond Gocaj 25 dhe 38 vjeç që kishin hotelin “Gocaj” dhe jetimi fatkeq Musaen Zeneli. Ai ishte vetëm 20 vjeç dhe punonte si kamerier për të mbajtur familjen. Nga breshëria e plumbave, Musaeni u godit në zemër dhe i mori jetën në vend.
Mediat italiane bëjnë me dije se i arrestuari ka qenë një nga të plagosurit në vendngjarje. Ai është shoqëruar në Burgun e Riminit në dispozicion të Autoritetit Gjyqësor, i cili do të vendosë për ekstradimin e tij.
