Tragjedia e ndodhur në Mandra të Athinës goditi edhe familjet shqiptare që jetojnë në këtë zonë. Përmbytjet në këtë zonë kanë lënë të vdekur 19 persona. Mes tyre edhe Petro Koleci, nga Saranda. Trupi i të riut është gjetur mes shkatërrimeve të përmbytjes, me ndihmën e qenve të repartit zjarrfikës. 29-vjeçari shqiptar rezultonte i zhdukur prej disa ditësh. Burimet paraprake bëjnë me dije se 29 vjeçari Petro Koleci ditën e përmbytjeve teksa shkonte në punë e mori rrjedha e ujit. Ai jetonte prej vitesh në Greqi dhe punonte si hidraulik. Petro ishte djali i vetëm i familjes Koleci nga fshati Kodra e Livadhisë.
Shiu ka pushuar në Mandra, por situata është kaotike. Qindra godina të dëmtuara, mijëra njerëz që humbën mundin e një jete të tërë, shkolla e fabrika të përmbytura, automjete të flakura tej sikur të ishin lodra, e mes tyre trupa të pajetë që ende vazhdojnë gjenden në det.
Më shumë se 2.000 familje gjenden në kushte të vështira, në qiell të hapur dhe pothuajse pa asnjë ndihmë nga shteti. Tragjedia ka goditur rreth 30 familje emigrantësh shqiptarë, të cilët – veçse kanë humbur çdo gjë, – tashmë përballen me shumë vështirësi për të mbijetuar./AlpeNews.al/
