Deputeti i Partisë Demokratike, Xhemal Gjunkshi, ka përgënjeshtruar Sali Berishën, pas akuzave të këtij të fundit, se Artur Meçollari është spiun i shërbimeve të huaja.
Ai thotë se kur ishte në krye të Shtabit të Përgjithshëm të Forcave të Armatosura nuk ka parë ndonjë raport të SHIUt se Meçollari ishte spiun.
Sipas Gjukshit, Meçollari është trajnuar nga amerikanët.
“Unë nuk kam pasur asnjë informacion në lidhje me largimin e tij nga shërbimi ushtarak. SHIU varej nga ministri i Mbrojtjes dhe nuk kishte lidhje me Shtabin e Përgjithshëm.
Unë personalisht nuk mbaj mend që të kem lexuar një raport apo informacion që Artur Meçollari ka bërë shkelje të detyrës apo ka bashkëpunuar me agjentura të huaja.
Nuk mund ta them këtë, sepse nuk e disponoj këtë informacion.
Por si individ dhe si ushtarak, Artur Meçollari ka vlerësimet e mia maksimale, është overqualified, kanë investuar Shtetet e Bashkuara të Amerikës jashtëzakonisht për kualifikimin dhe trajnimin e tij”, tha Gjunkshi për “Panorama”.
I pyetur nëse sheh paradoks te trajnimi i Meçollarit nga amerikanët dhe akuza për spiunazh, Gjunkshi tha se nuk i komenton dot akuzat.
