Taulant Balla ka publikuar në media dokumente, për të vërtetuar akuzat e tij nga foltorja e Kuvendit, se Lulzim Basha shkon te protestat te Unaza e Re me një makinë të kompanisë “Viktoria Invest”.
Më herët, nga foltorja e Kuvendit, kryetari i grupit parlamentar të Partisë Socialiste, akuzoi kreun e PD-së për lidhje me kompaninë “Viktora Invest”, që ka fituar tenderin e një loti te Unaza e Re.
“Takojmë edhe ne qytetarë të Unazës së Re. E njëri prej tyre Lulzim erdhi dje dhe më dha këtë dosje për ty. Do ta lë këtu ta marrësh ta lexosh. Tha: ore po si ka mundësi që nuk ia thoni Lulzimit se në këtu në Astir, ndihemi çik të fyer që ne këtu Lulëzimi na vjen përditë në protestë me makinën e pronarit të kompanisë që ndërton tenderin e Unazës. Si ka mundësi Lulzim? Kjo është dosja e makinën AA 11 EN. Kjo është makina që ti shkon përditë në protestën te Astiri. Këtu në dokumentet e makinës thotë që ti shkon përditë me makinën në pronësi të Viktoria Invest, një prej kompanive që ka fituar tenderin e një prej 3 lotëve të tenderit të Unazës. Ja ku e ke o Lulzim, po deshe edhe me fotografi të pronarit të kompanisë Viktora Invest, i cili është edhe blerësi në fakt i kësaj makine me vlerë 53 mijë euro që zotërote pasdite për pasdite u shkon banorëve të Astirit gjoja për ti mbrojtur këta nga kompania që qenka kompania e Edi Ramës. Po mirë bufa na di ne që nuk e dimë ne lidhjen tënde me kompaninë e Viktoria Invest?! Po nuk e dimë ne që shumë mirë që njëra nga vajzat e tua shumë e mirë e vogël e ka emrin Viktora. Dhe sigurisht janë disa arsye të kumbarllëkut. Kompania është kumbare e familjes tënde”,tha ndër të tjera Balla.
Në përgjigjen e tij lidhur me këto akuza, po nga foltorja e Kuvendit, kryetari i PD-së Lulzim Basha u shpreh: “Automjeti im prej 6 vjetësh është në lease nga kompania ‘Mektrin’, kompani shumë e mirë, meqë më dhe rastin t’i bëj reklamë. Nuk është as e ndonjë oligarku, as e ndonjë banditi, është enjë durrsaku të ndershëm. Pra makina ime është 6 vite me lease, nga kompania Mektrin o mashtrues i certifikuar.”
Pas kësaj, Balla ka publikuar dokumentet. Sipas tij, dokumentet vërtetojnë që makina është blerë nga “Viktoria Invest”.
