Ditën e sotme, Kryeministri Rama, krahas informacionit shterues mbi propozimin e tij për emërimin e Sandër Lleshit ministër të Brendshëm, do t’i dërgojë Metës në Gjykatën Kushtetuese edhe vendimin e tij të parë për mosdekretimin e Lleshit.
Maxhoranca pritet që ditën e sotme të depozitojë pranë institucionit të vetëm për interpretimin e Kushtetutës vendimin e parë të Presidentit Meta për të mosdekretuar Sandër Lleshin. Kërkesa e socialistëve konsiston nëse ka të drejtë Presidenti për të mosdekretuar një ministër, gjë që nga ana e Kryeministrit është cilësuar si krisje kushtetuese ndërmjet Qeverisë dhe Presidencës.
Kërkesa për interpretimin e Kushtetutës u paralajmërua pak ditë më parë edhe nga vetë Edi Rama, i cili vlerësoi se është e nevojshme që të shmangen precedentët me presidentët e tjerë, pasi, siç është shprehur ai, me Ilir Metën është i bindur se do të kuptohen. Por a mund ta bëjë këtë gjë tani kjo gjykatë?
Aktualisht, Kushtetuesja ka në përbërje të saj vetëm dy anëtarë. Por me dy anëtarë, praktikisht Gjykata Kushtetuese është jashtë loje. Kësisoj, kërkesa e socialistëve pritet të merret në shqyrtim vitin tjetër, kur pritet që të bëhet edhe emërimi i anëtarëve për vendet vakante që janë krijuar nga procesi i vetingut.
Vetë Kryeministri Rama është shprehur se këtë çështje nuk e ka me ngut dhe se përgjigjen do ta presë kur gjykata të jetë funksionale për të shmangur përplasje të tilla ndërmjet institucionit të Presidencës dhe Kryeministrisë.
PËRPLASJA
Përplasja ndërmjet Ramës dhe Metës shpërtheu me vendimin e Presidentit për të mos dekretuar Sandër Lleshin. Këtë vendim të Metës, Kryeministri e cilësoi si një krisje kushtetuese duke u shprehur se asnjë president më parë nuk kishte ndërmarrë një vendim të tillë dhe sipas tij, ai shkeli Kushtetutën.
Por ky qëndrim i Ramës duket se nuk i pëlqeu Presidentit. Në një prononcim për mediat pak ditë më parë, Meta i cilësoi diletantë të leximit të Kushtetutës të gjithë ata që mendojnë se Presidenti nuk ka të drejtë të mos dekretojë një propozim të një Kryeministri për ministër. Për të zgjidhur këtë konflikt ndërmjet tyre, mesa duket është dashur edhe ndikimi i Gramoz Ruçit si Kryetar i Kuvendit.
Tensionet ndërmjet Ramës dhe Metës u zbutën një ditë pasi Presidenti zhvilloi një takim me Kryetarin e Kuvendit. Për të parë ndikimin e Ruçit në “çështjen Lleshi” duhet të presim deri ditën e premte, kohë e cila përkon me afatin që i cakton Kushtetuta Presidentit për të shqyrtuar ripropozimin e Kryeministrit për emërimin e Sandër Lleshit ministër të Brendshëm.
