A e di që sot mund të gjesh punën e ëndrrave edhe duke qenë ulur në divanin e shtëpisë, me lap topin mbi gjunjë, veshur me pizhama, me flokë të pakrehura, duke ngrënë çokokrem? Mjafton të logohesh në Google Hangouts dhe të thuash: “Përshendetje, jam gati për intervistën”. Tamam kështu. Sot intervistat e punës bëhen në distancë. Sepse bota e rekrutimit të punonjësve ka ndryshuar shumë dhe kjo jo vetëm falë teknologjisë. Më shumë sesa si profesionist, duhet të tregosh aftësitë e tua si person. Sipas një studimi, një e treta e kandidatëve gënjejnë në CV, gjë që specialistët e dallojnë që në 5 sekondat e para. Ana pozitive e një interviste online është se kandidatët kanë mundësi të tregojnë përtej eksperiencave.
Qëndro në rrjet
“Tashmë nuk shkon ti tek puna, vjen puna tek ti. Ti ekspozohesh dhe pret”, shpjegon Darain Faraz, nga LinkedIn Uk. Kjo do të thotë që duhet të kesh profile të kuruara në rrjetet sociale. Është një pikë thelbësore, sepse kompanitë kërkojnë ata që janë të përshtatshëm për biznesin e tyre. Për një vend kontabilisti në një markë luksi të specializuar për pushimet në vendet me borë, para se të shqyrtonin CV-të, burimet njerëzore kontrolluan profilet e kandidatëve në rrjetet sociale. U mor në punë personi që kishte më shumë foto duke bërë ski. Kufijtë mes punës dhe jetës personale janë bërë shumë të hollë.