Bashkimi Evropian ka vlerësuar fushatën globale të Rusisë për furnizimin me vaksina kundër coronavirsit si një marifet propagandistik nga një regjim i padëshirueshëm.
Por, siç shkruan Reuters, duke u bazuar në deklarata të burimeve diplomatike dhe zyrtare të BE-së, blloku tanimë është duke menduar edhe për sigurimin e vaksinave Sputnik V të Moskës, ndërsa përpiqet të realizojë përpjekjet e tij për të vaksinuar 450 milionë njerëz.
Po sipas Reuters, një zyrtar i BE-së i cili negocion me prodhuesit e vaksinave në emër të bllokut tha se qeveritë e BE-së po shqyrtonin fillimin e bisedimeve me zhvilluesit e Sputnik V dhe do të duheshin kërkesa nga katër shtete të BE-së për të filluar procesin.
Siç thuhet më tej, Hungaria dhe Sllovakia kanë blerë tashmë vaksinën ruse, Republika Çeke është e interesuar dhe zyrtari i BE-së tha se Italia po konsideronte të përdorte bioreaktorin më të madh të vendit për prodhimin e vaksinave në një fabrikë ReiThera pranë Romës për të prodhuar Sputnik V.
Brukseli është kritikuar për shpërndarjen e ngadaltë të vaksinave të bllokut.
Në anën tjetër, Italia po intensifikon bllokimet, spitalet në rajonin e Parisit janë afër mbingarkesës dhe Gjermania ka paralajmëruar një valë të tretë.
BE ka nënshkruar marrëveshje me gjashtë prodhues të vaksinave perëndimore dhe ka filluar bisedime me dy të tjerë.
Ajo ka miratuar katër vaksina deri tani por problemet e prodhimit kanë ngadalësuar fushatën e saj.
Nëse Sputnik V do të bashkohej me arsenalin e vaksinave të BE-së, do të ishte një triumf diplomatik për Rusinë, tregtia e së cilës me bllokun është penguar prej vitesh nga sanksionet mbi aneksimin e Krimesë dhe ndërhyrjen e saj në Ukrainën lindore.
