Ari po forcon gjithnjë e më shumë reputacionin e tij si një “strehë e sigurt” për investitorët, në një kohë kur tregjet globale përballen me pasiguri të lartë. Luhatjet në bursat ndërkombëtare, rritja e inflacionit dhe tensionet gjeopolitike kanë shtyrë kapitalet drejt metaleve të çmuara, kryesisht arit dhe argjendit.
Situata e tensionuar në Lindjen e Mesme, përfshirë konfliktin në Iran që ka ndikuar drejtpërdrejt në tregjet e naftës, si dhe paqëndrueshmëria në Evropë dhe Amerikën e Jugut, kanë rritur ndjeshëm kërkesën për ar. Vetëm gjatë vitit 2025, çmimi i tij është rritur me rreth 64%, duke reflektuar interesin në rritje të investitorëve për siguri financiare
Më 10 mars, ari arriti një tjetër rekord historik, duke kaluar nivelin e 5,200 dollarëve për ons. Sipas analistëve, trendi rritës mund të vijojë edhe gjatë viteve në vijim, me disa parashikime që sugjerojnë se çmimi mund të arrijë deri në 6,000 – 6,300 dollarë për ons gjatë vitit 2026.
Ekspertët theksojnë se çmimi i arit ndikohet nga një sërë faktorësh ekonomikë dhe politikë si inflacioni, paqëndrueshmëria gjeopolitike dhe pasiguria ekonomike.
Parashikimet e ekspertëve
Edhe pse tregjet mbeten të paparashikueshme, disa nga pritshmëritë kryesore janë:
• Rritje mbi 6,000 dollarë për ons në 2026, e nxitur nga kërkesa e bankave qendrore dhe tensionet globale
• Shtim i kërkesës për ar fizik, si monedha dhe shufra, nga investitorët individualë
• Rritje e luhatshmërisë, me lëvizje të shpejta të çmimeve në periudha të shkurtra
Një shembull i kësaj paqëndrueshmërie u pa në fillim të vitit 2026, kur çmimi ra nga 5,419 dollarë në 4,660 dollarë për ons brenda pak ditësh, duke reflektuar ndjeshmërinë e tregut ndaj zhvillimeve globale.
