Ndërsa prej disa ditësh po përflitet brenda Frontit Opozitar, një lëvizje për krijimin e mundshëm të një Poli të tretë ku mendohet të bëhen bashkë Ben Blushi, Agron Duka, Nard Ndoka dhe Dashamir Shehi, një tjetër indicie ka ardhur sot për një tjetër projekt të supozuar.
Aleati dhe miku i Lulzim Bashës, Kryetari i LDE – Partia për Liri, Demokraci dhe Etikë Arian Galdini, ka postuar në profilin e tij në facebook një foto me ish – deputetin dhe Kryetarin e Partisë Zgjidhja z. Koço Kokëdhima. Prej disa muajsh Koço Kokëdhima është parë të afrohet ndjeshëm me Lulzim Bashën dhe politikanë të PD e të partive të tjera opozitare.
Ndonëse Arian Galdini e paraqet këtë foto si një kafe mes miqsh, mbetet për tu parë nëse ky takim mes këtyre dy politikanëve të Frontit Opozitar, Kokëdhima dhe Galdini, ka qenë vërtet një gjerbje kafeje e çlirët apo pas saj fshihet ndonjë lëvizje e re politike. Mbetet të presim javët në vijim, teksa priten zhvillime dinamike dhe surprizuese në skenën politike shqiptare.
