Autoritetet e emigracionit në Shtetet e Bashkuara kanë ndaluar një grua, e cila është nëna e nipit të zëdhënëses së Shtëpisë së Bardhë, Karoline Leavitt. Lajmi konfirmohet nga një burim i njohur me arrestimin dhe nga Departamenti i Sigurisë Kombëtare (DHS).
Zëdhënësi i DHS identifikoi të ndaluarën si Bruna Caroline Ferreira, shtetase braziliane. Sipas autoriteteve amerikane, Ferreira është cilësuar si një “imigrante e paligjshme me precedent penal”, pasi ka një arrestim të mëparshëm për dhunë fizike dhe ka qëndruar në SHBA me një vizë të skaduar që prej vitit 1999.
Televizioni lokal WMUR, i rrjetit ABC në New Hampshire, raportoi se ka folur me Michael Leavitt, vëllain e zëdhënëses Karoline Leavitt, i cili konfirmoi se Ferreira është ndaluar disa javë më parë. Ai shtoi se djali i tij 11-vjeçar, i cili është fryt i lidhjes së mëparshme me Ferreira, jeton me të që nga lindja, por vazhdon të ketë marrëdhënie me nënën.
Ndalimi i Ferreira-s vjen në një moment kur politika e emigracionit dhe deportimeve është një nga temat më të nxehta në debatet publike amerikane, ndërsa DHS nuk ka dhënë detaje të mëtejshme mbi hapat e radhës në procedurën e saj ligjore.
