Kryeministri Edi Rama ka thënë se vetë presidenti Ilir Meta që sot refuzon të dekretojë Gent Cakajn si ministër i Jashtëm, në kohën kur drejtonte Kuvendin, e ka marrë certifikatën e sigurisë brenda disa orëve. I ftuar në “Zonë e Lirë”, Rama tha se edhe ish-ministrja e LSI, Klajda Gjosha ka punuar 3 vite si ministre Integrimi pa certifikatë dhe se edhe Edmond Panariti kur ishte ministër i Jashtëm, s’kishte certifikatë.
“Meta si kryetar kuvendi e ka marrë brenda disa orësh për një aktivitet ku duhej të shkonte, se certifikata e sigurisë është një dokument që i jepet një individi që duhet të vihen në posedim të një dokumentacioni të klasifikuar. Meta është në shkelje të plotë të etikës, ligjit, që e ndalon presidentin të ketë opinione të cilat përcaktojnë nëse dekreton ose jo një ministër. Dua të kujtoj një fakt, n.q.s. ka pasur një moment konflikti dhëmb për dhëmb politik mes Metës dhe një ministri të propozuar nga kryeministri, ka qenë ai mes Bujar Nishanit dhe Xhafës. Pse Meta po sfidon kushtetutën? Për 3 vite Klajda Gjosha ka qenë pa certifikatë sigurie. Edhe Edmond Panariti ka qenë pa certifikatën e sigurisë kur ishte ministër i Jashtëm.”