Dezertimi i katër komandove shqiptarë, të cilët nuk u kthyen nga trajnimi në Uells, është komentuar edhe nga britanikja “The Sun”. Ata i kanë kushtuar një artikull këtij lajmi ku shkruajnë se pas zhdukjes nga trajnimi, katër ushtarët po fshihen nga frika.
Nisur nga informacionet në mediat shqiptare, “The Sun” shkruan se katër ushtarët , të identifikuar si Ajazi, Ylber Kotri, Aleksander Shkulaku dhe Klevis Lamkaj, përballen me rrezikun e dënimit me pesë vite burg.
“ Ata ishin në mesin e 11 shqiptarëve të trajnimit të NATO-s në Uellsin qendror, fluturimet dhe akomodimi i të cilëve, përfshirë natën e fundit në Londër, u paguan nga Ministria e Mbrojtjes. Një burim nga Tirna për median tonë tha: Ata duhet të ishin kthyer në bazë dhe të fluturonin mbrapsht për në Shqipëri ditën e nesërme”, shkruan The Sun.
Burime nga Shqipëria për median britanike kanë thënë se menjëherë pas lajmit të dezertimit të komandove janë marrë në pyetje familjarët e tyre. Ndërkohë po vazhdon hetimi në të dy vendet për gjetjen e komandove.
The Sun transmeton se trajnimi, i drejtuar nga brigada e 160-të e këmbësorisë dhe Shtabi i Uellsit me bazë në Breç, kishte pjesëmarrëse 139 ekipe nga e gjithë bota, ndër këta 11 ishin shqiptrë.
Shqiptarët e arratisur, veteranë të cilët kanë qenë pjesë e luftës në Afganistan, janë pjesë e komandove elitë, dhe fitonin rreth 220 paund në muaj, shkruan britanikja.
“The Sun” ka cituar edhe postimin në Facebook të Dritan Demiraj, ish-kreu i Forcave Speciale Shqiptare, i cili shkroi:
“Unë e konsideroj sjelljen e tyre të papranueshme. Unë e di se ata nuk paguhen mirë dhe punojnë në rrethana të vështira por ajo që bënë është totalisht e pa justifikueshme. Ata udhëtuan drejt Britanisë për të përfaqësuar Shqipërinë në një trajnim ushtarak dhe unë u bëj thirrje që të rikthehen në vendin e tyre sa më parë të jetë e mundur”.
Përgatiti AlpeNews.al
