Kryeministrja britanike, Theresa May deklaroi se do të dorëhiqet më 7 qershor, duke hapur rrugën për një kryeministër të ri të Britanisë së Madhe.
Në një deklaratë për median May tha se ajo kishte “bërë më të mirën” për të respektuar rezultatin e referendumit për daljen e Britanisë nga BE-ja.
Ajo shprehu “keqardhjeje të thellë” se nuk kishte qenë në gjendje të përfundonte procesin e Brexit-it.
Megjithatë ajo tha se një kryeministër i ri është “në interesin më të mirë të vendit”.
Ndëkohë mbylljen e fjalimit të dorëheqjes May e ka bërë me lot në sy.
May ka qenë nën presion për të dhënë dorëheqje pasi disa deputetë të partisë së saj dolën kundër planit të ri të Brexit-it, të cilin May tha se do ta dërgojë për votim në parlament.
Që nga janari i këtij viti, parlamenti britanik ka hedhur poshtë tri herë marrëveshjen e largimit të Britanisë nga BE-ja.