Bullgaria ka bllokuar nisjen e bisedimeve për anëtarësim të Maqedonisë së Veriut në Bashkimin Evropian, por mbështet fuqimisht Shqipërinë.
Kryeministri i Bullgarisë, Boyko Borissov, përmes një postimi në rrjetet sociale njofton se ka zhvilluar një bisedë telefonike me kryeministrin Edi Rama ku ka konfirmuar mbështetjen e fuqishme për Shqipërinë në rrugën drejt BE.
“Bullgaria e mbështet fuqimisht Shqipërinë në rrugën e saj drejt BE. Vendi ka treguar përgjegjësi dhe dëshirë për të bërë përparim. Në një bisedë telefonike me Edi Ramën, theksova se Bullgaria është ndër mbrojtësit më të mëdhenj të zgjerimit të BE në Ballkanin Perëndimor”, shkruan Borisov.
Ende nuk ka një datë për fillimin e Konferencës e Parë Ndërqeveritare që do t’i hapë rrugën anëtarësimit të Maqedonisë së Veriut dhe Shqipërisë.
Bullgaria vendosi veton për Shkupin zyrtar deri në zgjidhjen e problemeve me gjuhën, ndërsa Holanda vazhdon të jetë skeptike për Shqipërinë dhe përmbushjen e kushteve të vendosura ndaj saj./Gazeta SHQIP.
