Sipërmarrjet shqiptare të lojërave të fatit, qiramarrjes apo energjisë kanë normat e fitimit më të lartat në rajon, teksa nivelet e kthimit prej 70% nuk shihen në asnjë prej vendeve të tjera të Europës Juglindore. Përgjithësisht, kompanitë rajonale me ecuri më të mirë kanë një normë fitimi midis 14 dhe 22%.
Sipas SEE News, një njësi e inteligjencës për Europën Juglindore, me qendër në Bullgari, e cila harton renditjen e 100 sipërmarrjeve më të mëdha të Europës Juglindore, kompania më fitimprurëse në rajon në vitin 2017 ishte Hip – Petrohemija AD, me aktivitet në fushën e industrisë kimike, me një normë prej 53.8%. Kjo normë e lartë, më shumë sesa nga aktiviteti normal, ka ardhur si rrjedhojë e një konvertimi borxhi, që ka rritur me pesë herë kapitalin e regjistruar.
Në vend të dytë është Hidroelectrica SA, në Rumani, me aktivitet në energji, me 40.9%, e ndjekur nga Roomgaz, po në Rumani, me 37%. Për subjektet e tjera që renditen ndër 10 më fitimprurëset në rajon, norma e fitimit varion nga 14 në 22%.
Subjektet me pronësi shtetërore zënë tre vendet e para në listën e 10 sipërmarrjeve më fitimprurëse, që dominohen nga Rumania dhe Serbia, të cilat kanë përkatësisht nga katër dhe pesë biznese në listë, përkatësisht, thuhet në raport.
Sektorët me kthimin më të lartë në raport me të ardhurat në rajon janë nafta dhe gazi (në Shqipëri ky segment rezulton me norma minimale fitimi), tregtia, energjia, telekomunikacionet si dhe industria automative. Shqipëria është unike për numrin e lartë të bizneseve të lojërave të fatit, si në renditjen sipas të ardhurave ashtu dhe të përfitueshmërisë. Lojërat e fatit kanë shënuar rritje dyshifrore të të ardhurave, paradoksalisht që pas aksionit të qeverisë “Fundi i Marrëzisë” në gjysmën e dytë të 2013-s, teksa normat e fitimit mbeten më të lartat në ekonomi, duke i kaluar edhe 50%. o unike në Shqipëri janë dhe fitimet e larta të koncesioneve, të cilat kanë qenë historikisht biznese “të dhuruara”, me treg të sigurt, mungesë konkurrence e fitime të larta. Edhe kompanitë e ndërtimit raportojnë kthime deri në 40%, ndërsa në rajon mungojnë sipërmarrjet e ndërtimit, si në listën e më të mëdhenjve ashtu dhe kompanive më fitimprurëse, teksa lulëzimi i këtij sektori duket se ka marrë kaq hov vetëm në Shqipëri.
