Gazetari i Vlorës Ergys Alushi, ka reaguar pas anulimit të komedisë ‘Senatori Fox’ e trupës së teatrit të Vlorës e cila ishte lajmëruar se do të shfaqej të premten më 4 maj.
Gazetari bën me dije se shkak për mos shfaqjen e komedisë është bërë numri i vogël i biletave të shitura. Sipas tij ky është një alarm i cili ka kohë që bie por nuk dihet i cili është faji, i publikut apo i teatrit.
Ndërkohë një reagim ka ardhur në postimin e Alushit, nga regjisori dhe aktori Roland Minga i cili ka hedhur poshtë lajmin se komedia nuk është shfaqur.
“Shfaqja e të premtes në mbrëmje është dhënë, me pak bileta por është dhënë. Dhe mbi të gjitha shfaqja nga pikëpamja artistike ka shkuar shumë mirë”, shkruan Minga.
Më tej ai i bën thirrje të gjithëve për t’u bërë pjesë e ringritjes dhe mbarëvajtjes së teatrit.
Nuk ka munguar as përgjigjia e gazetarit Alushi i cili është shprehur se aktorët e regjisorët duhet të jenë të parët për të reaguar për ringritjen e teatrit.
“Në botën e qytetëruar ku duam të shkojmë artistët janë në parajojë të shoqërisë edhe me problematika qytetare e jo më për teatrin e tyre”, shkruan Alushi.
