Mesditën e sotme policia arriti të parandalonte një ngjarje e cila mund të kishte përfunduar me humbje jete. Uljan Kolgjegja, 39 vjeç, me një shishe benzinë në dorë tentoi të vetëdigjej përpara kryeministrisë, pasi kishte dy ditë pa punë.
Ai ishte kapur në shkelje nga policia rrugore, e cila i kishte hequr lejen e drejtimit dhe kështu nuk mund të ushtronte profesionin e tij si taksist.
Ndaj, Kolgjegja në kushte të rënduara psikologjike mendoi të vetëflijohej. Forcat Shqiponja kanë ndërhyrë në kohë dhe e kanë shoqëruar atë në komisariat, ku ka deklarur se pse vendosi të ndërmarrë këtë akt të frikshëm.
Mirëpo Uljan Kolgjegja nuk është një emër i panjohur për publikun dhe as një taksist i zakonshëm. Ai është bërë ‘VIP’ në ekranet tona për shkak të karakterit të tij shumë të veçantë.
Uljani u bë i njohur fillimisht pasi bëri tatuazh në gjoks ish-kryeministrin Sali Berisha, madje pas kësaj siguroi edhe një foto me idhullin e tij.
Më pas si duket 39-vjeçari u pendua dhe e mbuloi atë me një tatuazh tjetër, dragua.
Uljani gjithashtu ka bërë tatuazh në krah edhe moderatoren e njohur Marina Vjollca. Kjo e fundit e mahnitur nga fansi i saj publikoi edhe foto me Uljanin.
Ai kishte fiksim të modifikonte makinën e tij me foto dhe emra të personazheve të njohur, madje para 4 vitesh bënte thirrje që njerëzit të votonin për president Donald Trump, edhe pse vota e shqiptarëve nuk mund të shkonte për të, e as zëri i tij nuk mund të dëgjohej në SHBA.
