“Kam kryer diçka shumë të rëndë, thellë në zemrën time ndiej keqardhje, kur të dal nga burgu, dëshiroj të jem një person tjetër.”
Kështu shprehet i penduar shqiptari Pjetër Lleshi i cili ndodhet në burgun Mombello të Italisë, ku po vuan dënimin për vrasjen e një personi gjatë një grabitje me dhunë në shtëpi.
I intervistuar nga qelia nga emisioni “Messi a Fuoco”, Lleshi thotë se ndihet i penduar për atë që ka bërë. Madje kur të dalë nga burgu do të kërkojë të jetë tashmë një tjetër person.
“Kam kryer diçka shumë të rëndë, thellë në zemrën time ndiej keqardhje, kur të dal nga burgu, dëshiroj të jem një person tjetër. Po shkoj në shkollë për këtë. Unë jam edhe vetë djalë i dy prindërve dhe më vjen keq për familjen e viktimës”, tregon Lleshi.
Ngjarja e rëndë ndodhi mbrëmjen e 8 Korrikut të vitit 2014, ku një bandë shqiptarësh hynë në shtëpinë e familjes Raccagni nga Brescia. Mes tyre ishte edhe Pjetër Lleshi, i cili qëlloi me shishe në kokë, kryefamiljarin Pietro Raccagni.
Ai është dënuar përfundimisht me 15 vjet e gjashtë muaj burg për krimin e kryer.
E veja e të ndjerit rrëfen se si e sheh tashmë shqiptarin kriminel, që i mori jetën bashkëshortit të saj.
“Ishte një emocion i fortë» zbulon e veja Raccagni që kishte takuar tashmë të riun gjatë seancave të gjykimit. Edhe kur e pashë në TV, kisha të njëjtën përshtypje si gjithmonë: nuk mund ta shoh atë si një vrasës, si një kriminel. Ai është mosha e fëmijëve të mi, duket i turpshëm”, tregon Federica Pagani, e veja e Pietro Raccagni.