Partia Demokratike duket se po përgatitet për zgjedhjet e ardhshme parlamentare, madje po mundohet të rikthejë në gjirin e saj disa nga demokratët e vjetër.
Për këtë ka folur edhe ish-deputeti i PD-së dhe ish-ministri Tritan Shehu, i cili deklaron se tashmë ka ardhur momenti që të gjithë demokratët të bëhen bashkë.
“Opozita shqiptare ka nevojë për të gjithë ata që aspirojnë në Shqipëri. Për të gjithë ata që duan të bëhen pjesë e kësaj përmbysje të madhe e cila do të ndodhë në Shqipëri sepse ka nevojë për të.
Për të gjithë ata që duan të kontribuojnë, për opozitën shqiptare, për PD, absolutisht asnjë nuk është i tepërt”, u shpreh ai në një prononcim për Abc News.
“Shqipëria që të dalë nga ky batak që është ka nevojë për të gjitha kapacitetet e saj. Kapacitetet që janë në Shqipëri dhe që nuk janë sot, të edukuar në perëndim, me një vizion të qartë, njerëz me kontribute të këtushme.
Prurje të reja vlera që janë në Shqipëri, vlera që janë jashtë Shqipërisë sepse vetëm në këtë mënyrë do të gjenerohet ajo që i duhet Shqipërisë, përmbysja e madhe”, nënvizoi Shehu.
