Kanali i ujitjes në fshatin Mirakë të Librazhdit është rikthyer në funksion, pas ndërhyrjes së Inspektoratit Kombëtar për Mbrojtjen e Territorit.
Ndërhyrja erdhi pas ankesave të banorëve të Mirakës, Xibrakës dhe Polisit, të cilët denoncuan dëmtimin e kanalit përmes punimeve të paligjshme.
IKMT bën me dije se gjatë verifikimit në terren u konstatuan tuba plastikë dhe beton të vendosur në kanal nga shtetasi me inicialet M.H., pa lejen përkatëse të institucioneve shtetërore.
Njoftimi:
Kanali i burimit ujor dhe ujitjes në fshatin Mirakë të Bashkisë së Librazhdit është tashmë në funksion të plotë të banorëve për vaditjen e tokave të tyre. Inspektorati Kombëtar për Mbrojtjen e Territorit ju përgjigj ankesës së një grupi banorësh të Mirakës, Xibrakës dhe Polisit që denoncuan dëmtimin e këtij kanali me punime të paligjshme.
Inspektorët e IKMT-së verifikuan situatën në terren dhe konstatuan se shtetasi M.H. kishte vendosur tuba plastikë në kanal ndërsa kishte hedhur edhe beton duke reduktuar lëvizjen e ujit në diametrin e tubit. I gjithë punimi ishte kryer pa u pajisur me leje nga institucionet shtetërore.
Pas konstatimit të rastit, IKMT kreu të gjitha procedurat administrative dhe ndërhyri për të rikthyer kanalin në gjendjen e mëparshme, në shërbim të banorëve të këtyre tre fshatrave.
