Ditën e djeshme u zhvillua në Gjykatën e Krimeve të Rënda seanca e radhës për dy prej anëtarëve të bandës së “Babagjyshërve”, e njohur për një sërë grabitjesh të ndodhura në territorin shqiptar dhe atë maqedonas.
Bëhet fjalë për Fatmir Pjetrin dhe Dritan Kolën, dy prej anëtarëve, që ende nuk kanë marrë dënimin nga Gjykata, pasi janë kapur edhe më vonë se të tjerët. Në seancën e djeshme kanë dëshmuar administratori dhe roja i një aktiviteti privat në Vorë, i cili ra pre e grabitjes nga banda në vitin 2014, si edhe babai i njërit prej anëtarëve, Artur Tafanit, që mbeti i vrarë gjatë grabitjes së një argjendarie në Dibër të Madhe.
Të parët që kanë dëshmuar kanë qenë roja dhe administratori i pikës së grumbullimit të skrapit në Vorë dhe një punëtor i saj.
DËSHMITË PËR GRABITJEN E VORËS
Alfred V. ishte i pari që dëshmoi në gjyq për grabitjen e ndodhur në Vorë më datë 03.06.2014. Në këtë grabitje dyshohet se kanë marrë pjesë vetëm Pjetri dhe Kola dhe kanë mundur të marrin vetëm 150 mijë lekë të reja. Alfred V. ishte roja i subjektit, i cili ka dhënë detaje se si ka ndodhur grabitja. E gjithë ngjarja ka ndodhur pas orës 10:30, sepse në atë orar punëtorët dalin të hanë.
Në momentin që dolën, njëri prej tyre la pak derën hapur, në atë moment unë kthehem që të shikoj nëse është dikush tjetër duke ardhur dhe pashë një person me skafandër, jelek dhe pistoletë. Më pyeti nëse kisha armë dhe nga vendroja deri te zyrat e shefave është pak larg, më mori ashtu para.
Kur u futëm te zyrat më vuri pistoletën në kokë dhe unë qëndrova gjatë gjithë kohës me kokën poshtë. Ai u tha pronarëve të ngjiten lart sepse zyra ishte me dy kate, ndërsa i kërkoi shefes lekët. Më pas ikën të dy, ndezën motorin dhe ikën”, ka thënë ai.
Ndërsa pronari i firmës, Riza Z., ka dhënë shpjegimet e tij për momentin e ngjarjes. “Më sa mbaj mend, kam qenë te holli duke pirë kafe dhe shikoj rojën të shoqëruar nga dy persona. Unë i kam rënë derës së magazinës, se mund të dalësh edhe nga mbrapa, hyra aty dhe kam marrë në telefon Policinë. Nuk e kam fiksuar nëse kishin diçka në dorë apo jo, por që të dy ishin me skafandra. Më pas nuk kam parë gjë sepse unë jam futur te magazina”, ka thënë ai.
DËSHMIA E BABAIT TË TË VRARIT
Në seancën e djeshme ka dëshmuar edhe Mehdi Tafani, babai i Artur Tafanit, i cili mbeti i vrarë gjatë grabitjes së një argjendarie në Dibër të Madhe të Maqedonisë. Mehdi Tafani ka rrëfyer në Gjykatë se si e mori vesh lajmin për vdekjen e djalit dhe ku ishte ai para se të largohej. “Ka qenë ditë Bajrami dhe unë kam qenë duke kullotur lopët, kur erdha, e gjej djalin në shtëpi dhe kishte pirë pak raki.
Ai ishte kthyer nga Greqia ku edhe i kishin grisur dokumentet. Më pas iu luta që të hamë drek, por nuk pranoi. Unë ika sërish të kullosja lopët dhe u ktheva në darkë, por ai nuk ishte në shtëpi.
Pyeta ku është Turi dhe më thanë që kishte ikur. E telefonova, por s’m’u përgjigj. Më pas mora dhëndrin në telefon dhe bëmë denoncim në Policinë e Belshit. Ndërsa, Policia na tregoi për ngjarjen e ndodhur dhe ne shkuam në Peshkopi për të parë trupin. Kur u kthyem më ka thirrur Policia e Elbasanit, më treguan një foto dhe më dha foton e shokut të djalit, të cilin e kam takuar në Tiranë, ai e kishte emrin Fatmir Pjetri, më takoi pak kohë më vonë që nga momenti që kam folur në telefon dhe më tha se unë s’e kam vrarë djalin tuaj, por do të kërkoj për ata persona. Që nga ai takim 2 minutash, nuk e kam parë më asnjëherë atë person”, ka thënë babai i Artur Tafanit.
