Përplasjet SHBA- Rusi- Rusia dhe Shtetet e Bashkuara janë përplasur në Këshillin e Sigurimit të Kombeve të Bashkuara rreth dyshimeve se Qeveria e Sirisë ka përdorur sërish armët kimike në një zonë të kontrolluar nga rebelët.
Ambasadorja e SHBA-së, Nikki Haley, e akuzoi Rusinë për bllokimin e hetimeve mbi përdorimin e mundshëm të armëve kimike nga ushtria e presidentit sirian, Bashar al-Assad, në provincën e Goutas Lindore.
Sulmi ka ndodhur në fundjavë dhe Haley tha se Rusia i bllokon hetimet pavarësisht “dëshmive të dukshme për dhjetëra viktima”.
Dënimi i aktivistëve- Gjykata e Apelit në Hong Kong pritet të vendosë sot dënimin për Joshua Wong dhe dy aktivistë tjerë për rolin që kishin në organizimin e protestave katër vite më parë.
Përderisa Pekini ushtron shumë ndikim mbi punët e Hong Kongut, rasti i aktivistëve është provë kyçe për të parë nesë ky territor mund të mbrojë liritë themelore.
Rrëzimi i helikopterit- Në Japoni është rrëzuar një helikopter ushtarak, përkatësisht në ishullin jugor të Okinawa. Një anëtar i ekuipazhit ka vdekur, ndërsa një tjetër është i zhdukur. Nuk raportohet për vdekje të ndonjë civili.
Arrestimi i gazetarëve- Dy gazetarë të Reuters janë arrestuar deri sa po hetonin ekzistencën e një varri masiv të muslimanëve. Ata do të dalin para gjykatës në Mianmar sot.
Thellohet kriza në Maldive- Kriza politike në Maldive po shkon drejt përkeqsimit. Qeveria ka shpallur gjendjen e jashtëzakonshme dhe ka dërguar trupa për të rrethuar Gjykatën Supreme.
Dënimi për mjekun që dhunoi fëmijë- Ish-mjeku i ekipit olimpik të gjimnastikës së SHBA-së, Larry Nassar, është dënuar me burgim nga 40 deri në 125 vjet. Nassar mori dënimin e tretë dhe të fundit, për abuzimin seksual me gjimnastet femra.
Lirohet nga burgu trashëgimtari i Samsungut- Një gjykatë Apeli në Korenë e Jugut pezulloi një dënim me burg ndaj trashëgimtarit miliarder të kompanisë “Samsung Electronics”, Lee Jae-Young, dhe urdhëroi lirimin e menjëhershëm të tij. Gjykata reduktoi gjithashtu dënimet për katër drejtues të tjerë të Samsung-ut, që ishin dënuar krahas Lee Jae-Young.
Dhjetra civilë të vrarë në Siri- Së paku 23 civilë janë vrarë të hënën, kur forcat qeveritare të Sirisë kanë kryer sulme ajrore në një enklavë që kontrollohet nga rebelët, pranë Damaskut.
Katër fëmijë janë në mesin e të vrarëve në Goutan Lindore, ndërsa, së paku 70 persona janë plagosur.
Sulmuesi i Parisit del para gjyqit- I dyshuari i vetëm i mbijetuar nga sulmet terroriste në Paris më 2015 ka refuzuar të përgjigjet para trupit gjykues në një gjykatë në Belgjikë, ku është në gjyq për luftën me të shtëna që ka çuar në arrestimin e tij.
Salah Abdeslam ka thënë se nuk do të përgjigjet në pyetjet e gjykatësit. Prokurorët francezë besojnë se ai ka pasur rol të madh në sulmet e Parisit, më 2015, në të cilat persona të armatosur dhe sulmues vetëvrasës kanë vrarë 130 veta dhe kanë plagosur qindra të tjerë.
