Të hënën e 10 shkurtit, socialistët mbledhin për herë të parë për 2020, një nga strukturat e saj më të rëndësishme drejtuese, Kryesinë e partisë. Në orën 09.00, nën drejtimin e Kryetarit të Partisë Socialiste, z. Edi Rama pritet që të zhvillohet në selinë kryesore në Tiranë, mbledhja në përgatitje të Kongresit të radhës, që do të mbahet në datën 29 shkurt. Axhenda e detajuar e kësaj mbledhje nuk bëhet e ditur, por besohet se në të do të diskutohet rreth përmbylljes së procesit të zgjedhjes së Kryetarëve të PS në të 61 bashkitë e Shqipërisë pikësëpari.
Një proces ky që ka përfunduar gjatë muajit janar dhe ku pothuajse në të gjitha bashkitë ai është konkluduar. Përjashtim bëjnë vetë bashkitë e Pukës dhe të Bulqizës, ku pritet komandimi i përkohshëm i kryetarëve të PS, deri në përfundimin e këtij procesi dhe zgjedhjen definitive.
Një pikë tjetër që pritet të diskutohet në Kryesi, është ajo që lidhet me përgatitjen e axhendës së Kongresit socialist. Për këtë janë ngritur më parë grupet e punës që do të meren me përgatitjen e çështjeve kryesore që do të diskutohen në Kongres.
Një nga grupet e punës po meret me disa nga ndryshimet që duhen bërë në statutin e PS, që është edhe dokumenti themeltar, ose “Kushtetuta” e funksionimit të kësaj partie.
Një grup tjetër mesohet se po punon për programin e Partisë Socialiste, ku pritet të parashtrohen disa nga objektivat kryesore të së majtës shqiptare në dekadën e re ku ka hyrë vendi. Objektivat dhe sfidat e së majtës shqiptare deri në vitin 2030, pritet që të jetë një nga të rejat që do të parashtrohet dhe pritet që të mari dakordësinë e socialistëve në Kongres.
Në fundjavën që sapo lamë pas, në të gjithë Shqipërinë u mblodhën forumet drejtuese të PS ku delegatët e Kongresit të zgjedhur më parë sipas parimit “një anëtar një votë”, kanë nisur procesin e përzgjedhjes së kandidatëve për në Asamblenë e re Kombëtare të kësaj partie, që do të dali nga Kongresi.
Më pas do të jetë Asambleja e re që do të zgjedhi pas Kongresit, sekretariatin e Kryesinë e re të PS. Ky hap përmbyll gjithë procesin e riorganizimit dhe zgjedhjeve të brendshme në partinë më të madhe politike në Shqipëri, duke i dhënë mundësinë që të nisi me strukturat e rinovuara nga baza e deri në qendër, përgatitjet për zgjedhjet e përgjithshme parlamentare të qershorit 2021 ku PS synon të fitojë edhe mandatin e saj të tretë qeverisës.
Alpenews.al
