I penduari Artan Tafani ka kaluar në një tjetër rrëfim për ngjarjet kriminale. Ai tregoi se si u tentua ekzekutimi i Kujtim metës në Lushnjë, në muajin prill të vitit 2022. Shkak ishte inati që Laert Haxhiu kishte, sepse Meta mbështeste Aldo Baren.
Madje Haxhiu sipas tij u bë nervoz kur një nga grupi, Dorjan Shurdhi, u tërhoq pasi kishte frikë mos e kapnin kamerat. Pasi e shahu, Laerti sipas tij urdhëroi atë. Tafani shpjegoi se e qëlloi me 8 plumba Metën teksa pinte kafe në lokal, por nuk arriti ta vriste dot, edhe pse mori dy plumba në bark, pasi u përpoq menjëherë të largohej.
“Tentuam sërish të vrisnim Kujtim Metën dhe në vezhgim po e mbante Dorian Shurdhi. Por Dorian Shurdhi nuk deshte ta vrisnim, sepse kishte frikë se identifikohej nga kamerat e sigurisë. Unë me Laertin flisja në telefon dhe i tregoja për situatën dhe ai filloi të shante Dorianin dhe këmbëngulte që të bëhej vrasja. Më pas Laerti më dha informacion se Kujtimi ishte afër një lokali dhe më tha shko afrohu se e ke aty. Isha me një kapele në kokë dhe një pistoletë tip “Zastava” me silenciator. Shkova tek dera e lokalit, Kujtimi ishte duke pirë kafe i vetëm, unë Kujtimin e kisha parë nga Facebook, ma kishte treguar Laerti dhe e njoha. Sapo e pashë nxora armën dhe e godita drejt dhe ai hidhet nga karrigia dhe përpiqet të ikë, unë e qëllova prapë, i qëllova me 8 fishekë.
I penduari i bandës së Laert Haxhiut, Artan Tafani ka dhënë deklarime para hetuesve edhe më parë, për atentatin ku u plagos Kujtim Meta në Lushnjë, më 2022. Tafani ka rrëfyer se Laert Haxhiu kërkoi vrasjen e këtij personi të cilin e kishte inat, pasi njihej si mbështetës i Aldo Bares. “Laerti kërkoi ta vrisnim sepse nuk duronte dot faktin ta shihte duke lëvizur nëpër Lushnje. Unë e qëllova tetë herë, por ai shpëtoi”, mësohet të jetë shprehur Marjus Tafani.
Kujtim Meta, nuk kishte precedent penalë, por sipas policisë, kishte miqësi me Besmir Hidën, tregtar makinash, i cili ishte vrarë më parë më 1 tetor të vitit 2019 në Lushnjë. Hida ishte daja i Zamir Latifit të vrarë në vitin 2017 në ngjarjen e njohur si ‘masakra e Lushnjes’, për të cilën akuzohen Laert Haxhiu dhe Orges Bilbili.
