Prend e Antoneta Paluca, bashkëshortët që u plagosën me armë zjarri mbrëmjen e së shtunës para banesës së tyre në Kamzë të Tiranës, e kanë kaluar rrezikun për jetën.
Gjendja paraqitej më e rëndë për 51-vjeçarin, i cili ishte qëlluar me një plumb në brinjë dhe i është nënshtruar një ndërhyrjeje të vështirë kirurgjikale në Spitalin e Traumës, ndërsa e shoqja, 41-vjeçare, paraqitej në gjendje më të stabilizuar, pasi kishte marrë një plumb në këmbë.
Ndërkohë nga të dhënat e grupit hetimor, rezulton se çifti Paluca është plagosur në një atentat të mirorganizuar, për të cilin është përdorur një armë me silenciator, duke qenë se as familjarët dhe as fqinjët nuk kanë dëgjuar të shtëna.
Grupi hetimor ka sekuestruar pamjet e kamerave të sigurisë së banesës 5-katëshe të familjes Paluca në Kamzë, që mund të ndihmojnë për zbardhjen e dinamikës së ngjarjes, por edhe identifikimin e atentatorëve. Ndonëse burimet thonë se aktualisht e kanë emrin e një të dyshuari.
ATENTATI
Sipas grupit hetimor, Prend dhe Antoneta Paluca mbetën të plagosur në një pritë para shtëpisë së tyre, që sipas të dhënave kishte si qëllim ekzekutimin e tyre. Të paktën kjo është akuza e ngritur pas ngjarjes, që u klasifikua si vrasje e mbetur në tentativë.
Fillimisht autori ka qëlluar Prend Palucën, i cili ka marrë një plumb në brinjë që ka depërtuar thellë në trup. Ky i fundit iu nënshtrua një operacioni kirurgjikal në Spitalin e Traumës, ku ndodhet në gjendje më të stabilizuar.
Në arkivat e Policisë së Tiranës, ngjarja e së shtunës rezulton të jetë sulmi i dytë ndaj familjes Paluca me origjinë nga Puka. Tri vite më parë, në pragun e derës së shtëpisë së tyre, që tashmë është e blinduar nga kamerat e sigurisë, është vendosur dhe ka shpërthyer një sasi tritoli.
