Presidenti i Kosovës, Hashim Thaçi ka deklaruar se aspirata e tij për bashkangjitjen e Preshevës, Medvegjës dhe Bujanovcit me Kosovën i tejkalon kornizat Kushtetutuese të Kosovës edhe nëse si këmbim atij do t’i duhet të heqë dorë nga posti i presidentit.
I ftuar në emisionin ‘Pyetje nga Babaramo’ në Report Tv , Thaçi theksoi se Kosova gjëndet në një konflikt të ngrirë me Serbinë, i cili në një moment kur të mos jetë më prania ndërkombëtare në Kosovë, mund të shpërthejë.
‘Aspirata ime tejkalon kornizat Kushtetutuese të Kosovës, le të ndodhë ‘mëkati’ kur bëhet fjalë për bashkangjitjen e Preshevës, Medvegjës e Bujanovcit dhe unë më pas jap edhe dorëheëqjen nga posti që kam’, ka theksuar presidenti kosovar.
Sipas Thaçit, duhet të nxitohet për një marrëveshje me Serbinë sa më parë, ku Kosovës t’i bashkangjitet Presheva, Medvegja dhe Bujanovci.
‘Jetojmë në një konflikt të ngrirë, të cilin nga një moment në tjetrin mund të shpërthejë. Në mënyrë absolute kemi tre vija të kuqe përsa i përket marrëveshjes me Serbinë. Së pari nuk do të lejohet krijimi i Asociacionit të Komunave Serbe, pasi sjell një republikë srbska të re dhe një Dodik të ri në Kosovë dhe ballkan. Së dyti nuk duhet të flitet në tavolinat ndërkombëtare për Kosovën sepse inkorporon automatikisht rusët në dialog dhe së treti nuk duhet të flitet për aleanca ballkanike’, ka thënë Thaçi.
Presidenti u shpreh se një marrëveshje përfundimtare midis Kosovës dhe Serbisë, do të arrijë një transformim shoqëror dhe do të krijojë një lidership të ri.
