Pavarësisht reshjeve të pjesshme të shiut që kanë rënë gjatë 48 orëve të fundit, në territorin e Librazhdit, janë regjistruar disa vatra aktive zjarri të cilat kanë përfshirë sipërfaqe të konsiderueshme me bimësi dhe pyje në disa zona.
Një nga vatrat më problematike ndodhet në fshatin Dorëz, Njësia Administrative Qendër, konkretisht në zonën e njohur si “Kodra e Kuqe”. Zjarri aty ka nisur prej ditës së djeshme dhe ka përfshirë disa hektarë me bimësi të ulët, shkurre dhe barishte.
Aktualisht, ndërhyrja është përqendruar edhe në masivin pyjor të këtij fshati, ku është identifikuar një vatër tjetër që vazhdon të përhapet. Në këtë zonë po punojnë 4 efektivë të shërbimit zjarrfikës dhe një mjet zjarrfikës të cilët janë mbështetur edhe nga banorë të komunitetit të kësaj zone të cilët hanë vetë organizuar për të frenuar përhapjen e flakëve.
Si pasojë, operacioni po zhvillohet në mënyrë manuale, duke rrezikuar sigurinë e efektivëve dhe duke e zgjatur kohën e ndërhyrjes.
Lajmi pozitiv vjen nga fshati Xhyrë, ku pas përpjekjeve të vazhdueshme, zjarri që kishte përfshirë një pjesë të masivit pyjor është shuar plotësisht. Autoritetet policore kanë arritur të identifikojnë edhe autorin e zjarrvënies në këtë zonë, duke vënë në dukje se hetimet po vijojnë për të ndjekur penalisht personat përgjegjës.
