Detaje të reja dalin në dritë nga krimi që zbuloi policia e Fierit, pasi burri vrau një vit më parë gruan e tij. Siç pohuan dhe burime policore, NAMIK VELAJ akuzohet se vrau bashkëshorten e tij Vreke Velaj në janar të 2017-ës në banesën e tyre në Patos. Pavarësisht deklarimit të 75-vjeçarit se gruaja e tij kishte ndërruar jetë për shkaqe natyrale, e vërtetuar edhe nga mjeku i qendrës shëndetësore në Patos Ilir Tanku, kjo gjë nuk i ka bindur vëllezërit e të ndjerës.
Mësohet se vëllezërit e të moshuarës, të cilët jetonin jashtë Shqipërisë, pas dyshimeve për vdekjen e mistershme të motrës së tyre kishin bërë një denoncim në polici në muajin shtator, ndërsa akuzonin burrin e saj.
Duke mbledhur dëshmitë dhe me anë të hetimeve speciale në bashkëpunim me Prokurorinë për Krimet e Rënda është bërë e mundur të provohet se Namik Velaj e kishte vrarë bashkëshorten e tij. Bëhet me dije se viktima ishte mbytur.
Po ashtu është vërtetuar se Velaj nuk e kishte dërguar të shoqen në spital apo qendër shëndetësore, ndërsa kishte qenë mjeku Tanku që kishte shkuar për ta parë në shtëpi, duke evituar kështu policinë dhe mjekun ligjor.
Kujtojmë se 75-vjeçari Namik Velaj u vu në pranga, ndërsa ndaj mjekut Ilir Tanku u mor masa e heqjes së të drejtës së ushtrimit të profesionit për mjekun si edhe ka filluar procedimi penal për veprën penale “Shpërdorim i detyrës” dhe është dhënë masa e sigurisë “Detyrim paraqitje” në Policinë Gjyqësore.
