Kryetarja e Lëvizjes Socialiste për Integrim, Monika Kryemadhi është shprehur pozivitisht për aksionet e Policisë së Shtetit. Në ndryshim nga kryedemokrati Lulzim Basha, i cili u shpreh se aksionet e policisë, janë ‘cironka’ për të shpëtuar peshkun e madh, që sipas Bashës është kryebashkiaku i Durrësit, Vangjush Dako.
Në një takim me strukturat e LRI-së në Vlorë, Kryemadhi i ka quajtur këto operacione, ‘një sinjal’ pozitiv për të ardhmen e vendit. Kryemadhi i ka bërë thirrje policisë së Shtetit, që të ketë kujdes nga dekonspirimi i operacioneve.
Pjesë nga deklarata e Monika Kryemadhit:
Kemi dëgjuar për arrestimet e fundit që kanë ndodhur në Shqipëri që është një sinjal shumë i mirë për hir të së vërtetës, për shkak të sigurisë, është një sinjal shumë i mirë për të rinjtë, për t rejat, për popullin shqiptar, si një mundësi për të parë që diçka do të fillojë dhe do të shkojë në vend. Është një sinjal i mirë, sepse të ndalosh sot grupe kriminale apo të zbulosh laboratore droge, të cilat në një farë mënyre kanë njollosur të ardhmen e Shqipërisë, apo emrin e Shqipërisë në hartën e Europës, është diçka që fillon ti lëvizi gjërat, por nga ana tjetër skepticizmi, jo vetëm i klasës politike, por edhe skepticizmi i njerëzve është se sa e qëndrueshme do të jenë institucionet e drejtësisë, për të përballuar presionet e këtyre grupeve dhe bandave kriminale, të cilat janë arrestuar.
Janë arrestuar me ndihmën e partnerëve ndërkombëtarë, bashkë me strukturat e policisë shqiptare dhe përfitoj nga rasti për të falenderuar të gjithë ata individë, apo segmente, apo struktura të përfshira në këtë aksion kundër grupeve kriminale, por nga ana tjetër i bëj thirrje të gjithave atyre institucioneve, të cilët sot kanë në dorë lirimin ose ndalimin e tyre, që të jenë shumë të kujdesshëm që këtë aksion të ndërkombëtarëve në bashkëpunim edhe me Policinë e Shtetit, të mos ta dështojnë, të mos ta dekonspirojnë, por të ecin përpara.
