Ka ndodhur edhe ajo që as Arian Çani vetë nuk e ka imagjinuar, e as pretenduar ndonjëherë. Që të meret si modeli më pozitiv i profesionalizmit në mediat e sotme shqiptare. E thënë nga kushdo tjetër, sigurisht që nuk kishte asnjëherë vlerën e asaj që del nga goja e Kryeministrit të Shqipërisë, Edi Rama. Ja se çfarë shkruan ai në profilin e tij zyrtar në facebook: “Sonte në 9 tek Zona e Lirë e Arian Çanit që në këtë kohë dehjesh kolektive nëpër klubet e katundit mediatik, mbetet i vetmi kazan pa mbetje toksike“. Ky postim dhe kjo dalje mediatike e Ramës ka ardhur pas një përplasje që ai ka patur me gazetarët të mërkurën sapo doli nga salla e seancave plenare te Kuvendit, ku u rrëzua me 75 votat e majta, kërkesa e Prokurorisë së Krimeve të Rënda për ti hapurr rrugë arrestimit të mundshëm të ish ministrit të Brendshëm, Saimir Tahiri. Shkuarja e Ramës sonte tek Çani, tek simboli i gazetarisë ndryshe dhe promovimi i tij këtë radhë si maja e majave të profesionalizmit, me siguri që është një mesazh tjetër për mediat, sikur ti thoshte: Kur Zonë e Lirë është me e mira, imagjinoni se çfarë e ku jeni ju të tjerët. Nuk dihet nëse mediat do e pranojnë në heshtje si të mirëqenë këtë përcaktim, apo do të reagojnë përsëri në kor, kundër Kryeministrit. Nuk besohet, por ç’farë nuk bën vaki në këtë katundin tonë…