Me apo pa makeup për festa?

12 December, 2017 k.autor Këshilla, Modë

Pasi u mbyll muaji i modës, kritikët dhe gazetarët po vrisnin mendjen nëse trend i makeup-it do ishte ai që panë nëpër sfilata. Përgjithësisht ishte neutral, siç shpjegon Peter Phillips i Dior, fytyra duhet të shkëlqejë dhe të duket e shëndetshme, por ngjyrat të jenë të tokës.

Një detaj tjetër që vumë re në pasarela ishin kapakët e syve të ishin si të lyer me lip gloss, saqë ndonjëherë dukeshin si të lagur. Ky trend ka qënë gjithashtu rreth fundit të viteve `90, ku vetë toni i syve ishte kremoz si dhe i lëngshëm. Nuk këshillohet për çdo formë syri, sidomos për ata që i kanë kapakët e syve paksa të rënë. Flokët duhet të jenë të mbledhur në mënyrë të çrregullt që të evidentohet makeup-i më mirë.

Rekomandimi im për festa është tek tonet e verës apo lejlasë, duke qënë se edhe në modë kemi një rikthim të bujshëm të lejlasë si nuancë. Gjithsesi mos dilni nga vetja në asnjë rast, nëse jeni komodë me tonet e kafes, qëndrojini besnike, thjesht mund të shtoni ndonjë nuancë të florinjtë sa për t`i dhënë dritë kontureve. Fillojeni me kujdes ndaj lëkurës, pra sigurojini asaj hidratimin e nevojshëm në këtë sezon të ftohtë, si dhe mbrojtje nga Dielli. Edhe pse mund të mendoni se nuk ka rëndësi, rrezet e dëmshme janë të rrezikshme në çdo stinë. Për përditshmërinë time unë preferoj të përdor BB Cream në vend të Fond de Teint, një hijezues të lehtë, pak blush dhe lip balm. Nëse kam takime, zgjedh tone të ëmbla tek sytë, sa për t`i dhënë thellësi qepallave.

Po qe se jeni kuriozë, më poshtë keni një video tutorial, për të cilin kam bashkëpunuar (ose më saktë COCOMED më ftoi të bëhesha pjesë e familjes PuroBio cosmetics). Kam dy vite që i përdor rregullisht dhe mendova, pse jo? Kam realizuar një makeup për mbrëmje, i cili është ideal për festa. Duke ju uruar një javë të këndshme, po ju lë të ndiqni videon.