Ambasadori i Serbisë në Tiranë, Miroljub Zariq, ka deklaruar se Beogradi kurrë nuk do ta njeh pavarësinë e Kosovës.
Ai më tej ka shtuar se “Kosova ka qenë dhe do të mbetet pjesë e Serbisë”.
“Kosova është Serbi, e pavarur për ju (Shqipërinë). Për ne, Kosova është pjesë terrotiriale e Serbisë dhe nuk ka mundësi të pranohet alternativë tjetër”- ka thënë Zaric, raporton TVMost, përcjell Klan Kosova.
“Kosova ka qenë dhe është Serbi”- ka pohuar ai gjatë një vizitë të bërë në Shkodër, ku komuniteti serb dhe malazez ka festuar Krishtlindjen Ortodokse.
Më tej Zaric ka thënë se këto deklarata të tij nuk ndikojnë aspak në marrëdhëniet mes Serbisë dhe Shqipërisë.
Jo vetëm politikanët dhe diplomatet Serbe, por edhe priftërinjtë e Kishës Ortodokse vijojnë t’i qëndrojnë deklaratave të tyre, se “Kosova është Serbi”. E radhës erdhi në kremtimin e Krishtlindjes te fundit Ortodokse me pakicat serbo – malazeze në Vrakë të Shkodrës, nga kleriku Radomir Nikçevic. Ai tha se në Kosovë ka shumë varre të shenjtoreve serbë që në periudhën e mesjetës si dhe manastire e kisha.
