Sekretari i Shtetit Mike Pompeo lëshoi një deklaratë sot mbi Liderin Suprem të Iranit Ali Khamenei dhe trajtimin e regjimit iranian për shpërthimin e koronavirusit.
Deklarata e Pompeos thoshte se “trillimet” e Iranit po e vendosin popullin iranian dhe të tjerët në mbarë botën në rrezik më të madh, shkruan CNN.
Të dielën e 22 marsit, Udhëheqësi i Lartë i Iranit, Ajatollahu Ali Khamenei ngriti akuza kundër SHBA se ata kishin krijuar koronavirusin, duke pyetur pse njerëzit do t’i besonin SHBA me krijimin e një kurë për virusin. Ai sugjeroi që SHBA krijoi koronavirusin për të “antagonizuar më tej” popullin iranian.
Pompeo tha se Irani nuk ndërmori një veprim vendimtar dhe nuk po bën transparencë për numrin e rasteve dhe vdekjeve që vijnë nga koronavirusi.
“Regjimi iranian injoroi paralajmërimet e përsëritura nga zyrtarët e tij të shëndetit dhe mohoi vdekjen e parë nga koronavirusi për të paktën nëntë ditë. Regjimi vazhdon të gënjejë popullin iranian dhe botën për numrin e rasteve dhe vdekjeve, të cilat për fat të keq janë shumë më të larta nga sa pranon regjimi,” tha Pompeo në deklaratë.
Pompeo tha se Irani refuzoi ndihmën e Shteteve të Bashkuara për t’u marrë me pandeminë. “Khamenei e hodhi poshtë këtë ofertë sepse punon pa u lodhur për të përvetësuar teoritë e komplotit dhe i jep përparësi ideologjisë mbi popullin iranian,” tha Pompeo.
Rastet me Covid-19 në Iran: Vendi konfirmoi 1,411 raste të reja të infeksioneve koronavirus, duke e çuar numrin e përgjithshëm të rasteve në 23.049, tha zëdhënësi i Ministrisë së Shëndetësisë Kianush Jahanpoor në TV shtetëror ditën e sotme.
Ai tha se ka 127 viktima të tjera të lidhura me koronavirusin në vend, duke sjellë numrin e përgjithshëm të vdekjeve në 1,812.
