Shoqata e Biznesit të Vogël dhe të Mesëm i kërkoi dje qeverisë të anulojë ligjin për uljen e pragut të TVSH-së.
Drejtuesit e Shoqatës u shprehën se ulja e pragut të TVSH-së në 2 milionë lekë rrit kostot administrative për biznesin, rrit çmimin dhe ul fuqinë blerëse.
Nënkryetari i Shoqatës së Biznesit të Vogël dhe Mesëm, Bujar Muço në një deklaratë për mediat, i kërkoi qeverisë anulimin e ligjit të TVSH-së, në rast të kundërt ai paralajmëroi mbylljen e dyqaneve dhe nisjen e grevës së urisë. Shoqata e Biznesit të Vogël u shpreh se zbatimi i ligjit do të falimentojë rreth 50 mijë biznese.
“Sipas parashikimeve tona, ky ligj do të falimentojë 40 mijë deri në 50 mijë biznese në 2018-n. Shoqata e Biznesit të Vogël dhe bordi drejtues i kërkojnë qeverisë anulimin e ligjit të TVSH-së dhe ngritjen e pragut deri në 10 milionë lekë xhiro në vit; krijimin e një klime të favorshme për biznesin mes qeverisë qendrore dhe asaj lokale; konsultimin e ligjeve me grupet e interesit nga ana e qeverisë para se të miratohen; mbulimi dhe përkrahja me asistencë dhe kredi me interesa të buta për biznesin; ulja e taksave dhe tarifave ku është e mundur sipas ligjit nga pushteti lokal deri në 30 përqind; uljen e çmimit të energjisë dhe naftës. Kërkojmë nga qeveria që këto kërkesa të merren parasysh, pasi biznesi i vogël zë 93 për qind të bizneseve dhe falimentimi i tyre do të ketë ndikim social në vend. Në mosrealizim të kërkesave, ne kemi vendosur të mbyllim dyqanet dhe të kalojmë në grevë urie”, u shpreh Muça.
Shoqata e Biznesit të Vogël dhe të Mesëm renditi ndër arsyet kryesore për moszbatimin e ligjit, rritjen e kostos se biznesit dhe rritjen e çmimeve.
“Arsyet e kundërshtimit të këtij ligji, sipas shoqatës, janë që nga rritja e shpenzimeve të mirëmbajtjes së dokumentacionit të biznesit, nga 200 mijë lekë deri në 500 mijë lekë në vit, çka do të thotë se duhet të punësosh një ekonomist kontabël. Rritja e shpenzimit do të çojë në rritje të çmimeve të produkteve dhe në rënien e fuqisë blerëse. Rënia e fuqisë blerëse do të çojë në falimentimin e këtij biznesi.
Arsyeja tjetër, pse e kundërshtojmë, është sepse ligji është kundërshtuar edhe nga institucionet e specializuara financiare të huaja, si Fondi Monetar Ndërkombëtar, Banka Botërore”, u shpreh nënkryetari i Shoqatës së Biznesit, Bujar Muça./PANORAMA
