Katër pasagjerë, të cilët mbërritën në Greqi nga Britania e Madhe kanë rezultuar pozitiv me variantin e ri të Covid-19. Ata ishin mes udhëtarëve që mbërritën nga Britania gjatë javës së Krishtlindjeve.
Testimi dhe analizat speciale molekulare, që zgjatën të paktën tre ditë treguan se katër prej tyre mbanin mutacionin e virusit.
Sipas mediave lokale, ata po mbahen në një hotel të caktuar dhe pasi karantina e tyre të përfundojë për 10 ditë, ata do t’i nënshtrohen një testi të ri për Covid.
Ditën e shtunë autoritetet greke raportuat 262 raste, ndërsa një ditë më parë 597 infeksione. Numri i përgjithshëm i rasteve të konfirmuara në Greqi që kur u shfaq pandemia në vend është 140.099 dhe numri i personave që kanë humbur jetën 4.957.
