Ambasada e SHBA në Tirana ka vlerësuar qëndrimin dhe dënimin nga ana e KLP, lidhur me sulmet që janë bërë kundrejt SPAK.
Në reagimin në platformën X, ambasada e SHBA në Tiranë, thekson se Shtetet e Bashkuara të Amerikës janë në krah të qytetarëve shqiptarë që mbështesin institucionet e reja të drejtësisë.
Gjithashtu nënvizon se SHBA qëndron në krah të profesionistëve të drejtësisë që respektojnë ligjin dhe do të mbështesë të gjithë ata që kërkojnë t’i japin fund pandëshkueshmërisë.
“Përshëndesim dënimin nga KLP të sulmeve të drejtpërdrejta dhe të tërthorta kundër SPAK-ut në ditët dhe javët e fundit. Do të vazhdojmë të qëndrojmë në krah të shumicës dërrmuese të qytetarëve shqiptarë që mbështesin institucionet e reja të drejtësisë dhe rolin kyç që ato luajnë në demokracinë e Shqipërisë. SHBA qëndron në krah të profesionistëve të drejtësisë që respektojnë ligjin dhe do të mbështesë të gjithë ata që kërkojnë t’i japin fund pandëshkueshmërisë.”, thuhet në reagim.
Më herët ishte kreu i Partisë së Lirisë Ilir Meta i cili në deklaratat e tij të fundit nuk i ka kursyer sulmet nga kreut të SPAK, Altin Dumani, por edhe vetë këtij institucioni.
Ilir Meta nuk u kursye me akuzat ndaj Altin Dumanit, madje e etiketoi kreun e SPAK-ut si kushëri të një tjetër personazhi në SPAK, Nuredin Dumanit.
“Pse çfarë prisni ju, Kushëriri i Nuredinit, do thotë që e takova? I papërgjegjshëm dhe delikuent. Nuk presim integritet nga dikush që ka hyrë thellë në lojërat politike të Edi Ramës.”, tha Meta gjatë deklaratës së tij.
Lidhur me këto deklarata reagoi edhe vetë Këshilli i Lartë i Prokurorisë, duke dënuar sulmin e kryetarit të Partisë së Lirisë, Ilir Meta, ndaj kreut të SPAK, Altin Dumani.
Në një reagim zyrtar, KLP u shpreh se dënon me forcë veprimet fyese dhe intimiduese që kanë për qëllim denigrimin e figurës së prokurorëve apo të ushtrojë presion ndaj tyre.
