Dikur portier i 2 Korrikut, por që më pas karrierën e vazhdoi me aktrim, ai është kthyer sërish sportit më popullor në botë.
Këtë herë, ai ka vendosur që të investojë në siç e quan ai “dobësinë” që ka për sportin.
Në një intervistë për mediat vendase, Vedat Bajrami ka pranuar është duke investuar në KF Rilindja të Prishtinës, në të cilën thotë se nuk është i vetëm.
“Po është e vërtetë. Nuk kam dashur ta bëjë publike, sepse unë nuk dua të bëj hop dhe të dalë të lavdërohem ende pa nisur punën. Kam dashur të bëjmë fillimisht punë dhe më pas të dalim në media. Ne jemi tre investitorë, emrat e dy të tjerëve nuk po dua t’i bëj publik, nuk janë fytyra publike”, është shprehur ai.
“Ne kemi hyrë në klub që nga muaji gusht i këtij viti. I falënderojmë investitorët e mëhershëm të cilët kanë bërë një punë të mirë dhe atë punë ne jemi tash duke e vazhduar, madje nuk kemi dashur as t’ia ndërrojmë emrin. Fillimisht jemi duke investuar në infrastrukturë, ku po e rregullojmë stadiumin në Taukbahçe, të cilin po e bëjmë me ndriçim. Jemi gati për ta kompletuar fushën me bar sintetik dhe me ndriçim. Deri më tani kemi bërë goxha investime, nuk dua të flasë për shuma, por do të vazhdojmë të investojmë”, ka shtuar aktori.
