Presidenti amerikan, Joe Biden, denoncoi Hamasin për atë që e quajti “akt të pastër mizorie” ndaj Izraelit, dhe theksoi mbështetjen e Shteteve të Bashkuara, që siç tha vajtojnë vdekjen e mbi 1 mijë qytetarëve izraelit, përfshirë dhe 14 amerikanë. Biden i përshkroi si rrëqethëse raportimet për prindër të therur, foshnje të vrara, familje të ekzekutuara dhe gra të përdhunuara.
Kreu i Shtëpisë së Bardhë foli pas telefonatës së tretë të zhvilluar në 4 ditë me kryeministrin Izraelit, Benjamin Netanjahu. Presidenti bëri të ditur se i kishte thënë homologut se përgjigjja e tyre do të ishte e shpejtë, e vendosur dhe dërrmuese nëse Shtetet e Bashkuara do të ishin sulmuar në këtë mënyrë, por se demokracitë duhet gjithashtu t’i përmbahen sundimit të ligjit në kohë lufte.
“E dini, ka momente në këtë jetë, kur e keqja e pastër shpaloset në sytë e botës. Populli I izraelit përjetoi një moment të tillë, këtë fundjavë, nga duart e përgjakura të organizatës terroriste të Hamasit, një grup që ka qëllimin të asgjësojë hebrenjtë. Ky ishte një akt i pastër mizorie. Mbi 1 mijë civilë u masakruan, jo vetëm vranë, por u masakruan, mes të cilëve edhe 14 shtetas amerikanë. Prindër të therur, teksa përdornin trupat e tyre për të mbrojtur fëmijët, raportime rrëqethëse për bebe të vrara dhe familje të tëra të ekzekutuara. Ky sulm risolli në kujtesë ngjarjet e dhimbshme, plagët e lëna nga gjenocidi ndaj popullit hebre gjatë holokaustit. Prandaj në këtë moment duhet të jemi shumë të qartë. Jemi me popullin izraelit. Dhe ne do të sigurohemi që Izraeli të ketë gjithçka ka nevojë për të mbrojtur qytetarët dhe veten. Nuk ka justifikim për terrorizmin”.
Joe Biden, President i SHBA-së
Shtetet e Bashkuara po intensifikojnë ndihmat ushtarake ndaj Izraelit, me avionin e parë me armatime që mbërriti në jug të vendit, mbrëmjen e së martës.
