Një aksident i rëndë u shënua mbrëmjen e djeshme në Rrugën e Kombit, ku si pasojë kanë ndërruar jetë tre persona nga Kosova, ndërsa një vajzë 3 vjeçe ndodhet në gjendje kritike.
Sipas të dhënave paraprake mësohet se familja nga Kosova ishte duke udhëtuar me një makinë tip “Citroen” me targa “C1-351-MH” drejt vendit tonë, kur është përplasur fatalisht me një kamion. Aksidenti ka ndodhur në aksin Milot-Rrëshen në afërsi të Rubikut.
Viktimat janë Blerim Avdiaj 49-vjeç së bashku me bashkëshorten Anjezën dhe dy fëmijët, ndërsa ka mbetur e plagosur rëndë vajza tre vjeçe Violeta.
Ambasadori i Kosovës në Shqipëri Nait Hasani, ka treguar gjendjen e vajzës. Ai ka thënë se ajo është ende në gjendje jo stabile.
“Ka ndodh një aksident në Rubik. Kemi 4 të vdekur, një është i lënduar, një fëmijë. Është me lëndime të rënda, është në gjendje ende jo stabile. Mjekët janë duke bërë përpjekje për trajtimin dhe ekzaminimin, ato që kanë mundësi, për ti shpëtuar jetën. Kështu, kemi 4 të vdekur. Janë nga Prishtina ose më saktë nga rrethi i Prishtinës. Shoferi i kamionit është nga komuna e Rahovecit. Është e dhimbshme! Familjarëve u shprehim ngushëllime”, tha ndër të tjera Hasani.
